ਜਿੰਦਾ ਔਰਤ ਨੂੰ ਮ੍ਰਿਤਕ ਐਲਾਨ ਕੇ ਲਾਸ਼ ਲਿਜਾਣ ਲਈ ਕਿਹਾ
ਪਰਿਵਾਰ ਵਲੋਂ ਕਨੂੰਨੀ ਕਾਰਵਾਈ ਦੀ ਮੰਗ
ਹੁਸ਼ਿਆਰਪੁਰ 22 ਅਗਸਤ (ਵਿਸ਼ਵ ਵਾਰਤਾ)- ਇਕ ਪਾਸੇ ਜਨਤਾ ਕੋਵਿਡ 19 ਮਹਾਮਾਰੀ ਕਰਕੇ ਭਾਰੀ ਤਕਲੀਫਾਂ ਦਾ ਸਾਹਮਣਾ ਕਰ ਰਹੀ ਹੈ ਦੂਜੇ ਪਾਸੇ ਨਿੱਜੀ ਹਸਪਤਾਲਾਂ ਦੇ ਡਾਕਟਰਾਂ ਅਤੇ ਸਟਾਫ ਦੀ ਲਾਪ੍ਰਵਾਹੀ ਵਾਲੀਆਂ ਕਾਰਵਾਈਆਂ ਕਾਰਨ ਹੋਰ ਵਧੇਰੇ ਪ੍ਰੇਸ਼ਾਨੀਆਂ ਵਿੱਚ ਉਲਝ ਰਹੀ ਹੈ।ਜਿਸਦੀ ਤਾਜਾ ਘਟਨਾ ਉਸ ਸਮੇਂ ਸਾਹਮਣੇ ਆਈ ਜਦੋਂ ਚੰਡੀਗੜ ਰੋਡ ਤੇ ਸਥਿਤ ਆਈ.ਵੀ.ਵਾਈ.ਦੇ ਡਾਕਟਰ ਅਤੇ ਸਟਾਫ ਵਲੋਂ ਜਿਊਂਦੀ ਔਰਤ ਨੂੰ ਮ੍ਰਿਤਕ ਐਲਾਨ ਕਰਕੇ ਲਾਸ਼ ਲਿਜਾਣ ਲਈ ਕਹਿ ਦਿੱਤਾ ਗਿਆ,ਜਿਸ ਨਾਲ ਪਰਿਵਾਰਕ ਮੈਂਬਰਾਂ ਦੇ ਹੋਸ਼ ਉਡ ਗਏ ਅਤੇ ਘਰ ਵਿੱਚ ਪਿੱਟ ਸ਼ਿਆਪਾ ਪੈ ਗਿਆ।ਮਿਲੀ ਜਾਣਕਾਰੀ ਅਨੁਸਾਰ ਹਸਪਤਾਲ ਵਿੱਚ ਉਸ ਸਮੇਂ ਹੰਗਾਮਾ ਹੋ ਗਿਆ ਜਦੋਂ ਜਿਊਂਦੀ ਔਰਤ ਨੂੰ ਮ੍ਰਿਤਕ ਐਲਾਨ ਕੇ ਲਾਸ਼ ਲੈ ਕੇ ਜਾਣ ਲਈ ਕਹਿ ਦਿੱਤਾ ਗਿਆ।ਇਸ ਸਬੰਧੀ ਦਰਸ਼ਨ ਸਿੰਘ ਕਤਨੋਰੀਆ ਨੇ ਦੱਸਿਆ ਕਿ ਉਸਦੀ ਪੁੱਤਰੀ ਨੀਲਮ ਰਾਣੀ (49)ਪਤਨੀ ਸਵ.ਮੁਲਖ ਰਾਜ ਵਾਸੀ ਜਹਾਨ ਖੇਲਾਂ ਬਲੱਡ ਪ੍ਰੇਸ਼ਰ ਤੇ ਸੂਗਰ ਦੀ ਬਿਮਾਰੀ ਤੋਂ ਪੀੜਤ ਹੈ,ਜਿਸਨੂੰ ਇਲਾਜ ਲਈ 16 ਅਗਸਤ ਨੂੰ ਆਈ.ਵੀ.ਵਾਈ.ਹਸਪਤਾਲ ਚੰਡੀਗੜ ਰੋਡ ਰਾਮ ਕਲੋਨੀ ਕੈਂਪ ਹੁਸ਼ਿਆਰਪੁਰ ਵਿਖੇ ਦਾਖਲ ਕਰਾਇਆ ਗਿਆ ਸੀ, ਜਿਥੇ ਡਾ.ਤੀਰਥ ਸਿੰਘ ਵਲੋਂ ਉਨਾਂ ਦਾ ਇਲਾਜ ਕੀਤਾ ਜਾ ਰਿਹਾ ਸੀ।ਉਨਾਂ ਦੱਸਿਆ ਕਿ 19 ਅਗਸਤ ਰਾਤ 12.48 ਮਿੰਟ ਤੇ ਉਨਾਂ ਨੂੰ ਹਸਪਤਾਲ ਤੋਂ ਫੋਨ ਆਇਆ ਕਿ ਨੀਲਮ ਰਾਣੀ ਬਹੁਤ ਸੀਰੀਅਸ ਹੈ ਉਸਦਾ ਹਾਰਟ ਬਲੌਕ ਹੋ ਗਿਆ ਹੈ ਜਲਦੀ ਪਹੁੰਚੋ।ਫਿਰ 12.52 ਮਿੰਟ ਤੇ ਦੂਜਾ ਫੋਨ ਆਇਆ ਕਿ ਨੀਲਮ ਰਾਣੀ ਦੀ ਮੌਤ ਹੋ ਗਈ ਹੈ ਉਸਦੀ ਲਾਸ਼ ਆਕੇ ਲੈ ਜਾਉ।ਦਰਸ਼ਨ ਰਾਮ ਕਤਨੋਰੀਆ ਨੇ ਕਿਹਾ ਕਿ ਇਹ ਸੁਣਕੇ ਸਾਡੇ ਪੈਰਾਂ ਹੇਠੋਂ ਜਮੀਨ ਨਿੱਕਲ ਗਈ ਅਤੇ ਘਰ ਵਿੱਚ ਪਿੱਟ ਸਿਆਪਾ ਪੈ ਗਿਆ। ਮੈਂ ਆਪਣੇ ਦੋਹਤੇ ਮਨਜੀਤ ਸਿੰਘ ਅਤੇ ਹੋਰ ਪਰਿਵਾਰਕ ਮੈਬਰਾਂ ਨੂੰ ਨਾਲ ਲੈ ਕੇ ਹਸਪਤਾਲ ਪਹੁੰਚੇ,ਤਾਂ ਉਥੇ ਡਿਊਟੀ ਤੇ ਹਾਜਰ ਡਾ.ਪੰਕਜ ਨੂੰ ਨੀਲਮ ਰਾਣੀ ਬਾਰੇ ਪੁੱਛਿਆ ਤਾਂ ਡਾ.ਪੰਕਜ ਨੇ ਕੁਰਸੀ ਤੇ ਬੈਠੇ ਨੇ ਹੀ ਕੱਪੜੇ ਵਿੱਚ ਲਪੇਟੀ ਲਾਸ਼ ਵੱਲ ਇਸ਼ਾਰਾ ਕਰ ਕਿਹਾ ਉਹ ਸਾਹਮਣੇ ਪਈ ਹੈ ਨੀਲਮ ਰਾਣੀ ਦੀ ਲਾਸ਼।ਉਨਾਂ ਕਿਹਾ ਜਦੋਂ ਅਸ਼ੀ ਕੱਪੜਾ ਚੁੱਕ ਕੇ ਲਾਸ਼ ਦੇਖੀ ਤਾਂ ਉਹ ਕਿਸੇ ਹੋਰ ਔਰਤ ਦੀ ਲਾਸ਼ ਸੀ।ਉਨਾਂ ਕਿਹਾ ਕਿ ਜਦੋਂ ਉਨਾਂ ਡਾਕਟਰ ਨੂੰ ਨੀਲਮ ਬਾਰੇ ਪੁੱਛਿਆ ਤਾਂ ਉਨਾਂ ਕਿਹਾ ਕਿ ਰਿਸ਼ੈਪਸ਼ਨ ਤੋਂ ਜਾ ਕੇ ਪੁੱਛੋ।ਉਨਾਂ ਕਿਹਾ ਕਿ ਜਦੋਂ ਉਨਾਂ ਵਾਰਡ ਨੰਬਰ ਤਿੰਨ ਵਿੱਚ ਜਾ ਕੇ ਦੇਖਿਆ ਤਾਂ ਨੀਲਮ ਰਾਣੀ ਹਸਪਤਾਲ ਦੇ ਕਮਰੇ ਵਿੱਚ ਠੀਕ ਸੀ।ਪਰਿਵਾਰਕ ਮੈਂਬਰਾਂ ਨੇ ਦੋਸ਼ ਲਾਇਆ ਕਿ ਹਸਪਤਾਲ ਦੇ ਸਟਾਫ ਦੀ ਇਸ ਲਾਪ੍ਰਵਾਹੀ ਨਾਲ ਪੂਰਾ ਪਰਿਵਾਰ ਮਾਨਸਿਕ ਤੌਰ ਤੇ ਪ੍ਰੇਸ਼ਾਨ ਹੋ ਗਿਆ।ਉਨਾਂ ਦੱਸਿਆ ਕਿ ਨੀਲਮ ਰਾਣੀ ਦੀ ਮਾਤਾ ਸੁਰਜੀਤ ਕੌਰ ਜੋ ਕਿ ਹਾਰਟ ਦੀ ਮਰੀਜ ਹੈ, ਇਸ ਘਟਨਾ ਤੋਂ ਬਾਅਦ ਸਦਮੇ ਵਿੱਚ ਹੈ।ਪਰਿਵਾਰਕ ਮੈਂਬਰਾਂ ਨੇ ਕਿਹਾ ਕਿ ਉਹ ਅਜਿਹੇ ਹਸਪਤਾਲ ਵਿੱਚ ਦੁਬਾਰਾ ਕਦੀ ਨਹੀਂ ਜਾਣਗੇ ਜਿਥੇ ਮਰੀਜਾਂ ਨਾਲ ਜਿਹਾ ਵਰਤਾਰਾ ਕੀਤਾ ਜਾਂਦਾ ਹੈ। ਇਸ ਸਮੇਂ ਪਰਿਵਾਰਕ ਮੈਂਬਰਾਂ ਨੇ ਮੰਗ ਕੀਤੀ ਕਿ ਹਸਪਤਾਲ ਦੇ ਡਿਊਟੀ ਤੇ ਹਾਜਰ ਡਾਕਟਰਾਂ ਅਤੇ ਸਟਾਫ ਖਿਲਾਫ ਭਾਰੀ ਲਾਪ੍ਰਵਾਹੀ ਵਰਤਣ,ਸਾਰੇ ਪਰਿਵਾਰ ਨੂੰ ਮਾਨਸਿਕ ਤੌਰ ਤੇ ਪ੍ਰੇਸ਼ਾਨ ਕਰਨ ਕਰਕੇ ਬਣਦੀ ਕਨੂੰਨੀ ਕਾਰਵਾਈ ਕੀਤੀ ਜਾਵੇ।
ਕੀ ਕਹਿਣਾ ਹੈ ਆਈ ਵੀ ਵਾਈ ਦੇ ਡਾਕਟਰ ਪੰਕਜ ਦਾ :-ਇਸ ਸਬੰਧੀ ਡਾਕਟਰ ਪੰਕਜ ਤੋਂ ਉਨਾਂ ਦੇ ਫੋਨ ਤੇ ਪੱਖ ਜਾਨਣ ਲਈ ਗੱਲ ਕੀਤੀ ਤਾਂ ਉਨਾਂ ਆਪਣੀ ਭਾਰੀ ਗਲਤੀ ਨੂੰ ਮੰਨਣ ਤੋਂ ਇੰਨਕਾਰ ਕਰਦਿਆਂ ਕਿਹਾ ਕਿ ਤੁਸ਼ੀ ਹਸਪਤਾਲ ਆ ਜਾa ਬੈਠ ਕੇ ਗੱਲ ਕਰਦੇ ਹਾਂ।ਪਰ ਜਦੋਂ ਉਨਾਂ ਨੂੰ ਕਿਹਾ ਕਿ ਜੋ ਕਹਿਣਾ ਹੈ ਫੋਨ ਤੇ ਹੀ ਦੱਸ ਦਿa ਤਾਂ ਉਨਾਂ ਇਹ ਕਹਿ ਕੇ ਕਿ ਮੈਂ ਕੁੱਝ ਗਲਤ ਨਹੀਂ ਕੀਤਾ,ਬਾਕੀ ਮੈਂ ਮੈਂਨਜਮੈਂਟ ਨਾਲ ਗੱਲ ਕਰਕੇ ਦੱਸਾਂਗਾ ਕਹਿਕੇ ਪੱਲਾ ਝਾੜ ਲਿਆ।
