ਬੰਗਲਾਦੇਸ਼ ‘ਚ ਨਵੇਂ ਕਰੰਸੀ ਨੋਟ ਜਾਰੀ
– ਸ਼ੇਖ ਹਸੀਨਾ ਦੇ ਪਿਤਾ ਸ਼ੇਖ ਮੁਜੀਬੁਰ ਦੀ ਹਟਾਈ ਗਈ ਫੋਟੋ
– ਹੁਣ ਕਰੰਸੀ ਤੇ ਦਿਖਾਈ ਦੇਣਗੀਆਂ ਇਹ ਤਸਵੀਰਾਂ
ਬੰਗਲਾਦੇਸ਼, 2 ਜੂਨ (ਵਿਸ਼ਵ ਵਾਰਤਾ): ਬੰਗਲਾਦੇਸ਼ ਦੇ ਕੇਂਦਰੀ ਬੈਂਕ ਨੇ ਨਵੇਂ ਡਿਜ਼ਾਈਨ ਵਾਲੇ ਨਵੇਂ ਕਰੰਸੀ ਨੋਟ ਜਾਰੀ ਕੀਤੇ ਹਨ। ਇਨ੍ਹਾਂ ਨਵੇਂ ਕਰੰਸੀ ਨੋਟਾਂ ਤੋਂ ਗੱਦੀਓਂ ਲਾਹੀ ਗਈ ਪ੍ਰਧਾਨ ਮੰਤਰੀ ਸ਼ੇਖ ਹਸੀਨਾ ਦੇ ਪਿਤਾ ਅਤੇ ਬੰਗਲਾਦੇਸ਼ ਦੇ ਸੰਸਥਾਪਕ ਸ਼ੇਖ ਮੁਜੀਬੁਰ ਰਹਿਮਾਨ ਦੀ ਤਸਵੀਰ ਹਟਾ ਦਿੱਤੀ ਗਈ ਹੈ।
Bangladesh
ਹੁਣ ਸ਼ੇਖ ਮੁਜੀਬੁਰ ਰਹਿਮਾਨ ਦੀ ਫੋਟੋ ਦੀ ਬਜਾਏ ਨਵੇਂ ਨੋਟਾਂ ਵਿੱਚ ਬੰਗਲਾਦੇਸ਼ ਦੇ ਮਸ਼ਹੂਰ ਸੈਰ-ਸਪਾਟਾ ਸਥਾਨਾਂ, ਕੁਦਰਤੀ ਦ੍ਰਿਸ਼ਾਂ ਅਤੇ ਰਵਾਇਤੀ ਸਥਾਨਾਂ ਨੂੰ ਦਰਸਾਇਆ ਗਿਆ ਹੈ। ਬੰਗਲਾਦੇਸ਼ ਦੇ ਕੇਂਦਰੀ ਬੈਂਕ ਨੇ ਕਿਹਾ ਕਿ ਨਵੇਂ ਨੋਟਾਂ ਦੇ ਨਾਲ ਨਾਲ ਸ਼ੇਖ ਮੁਜੀਬੁਰ ਰਹਿਮਾਨ ਦੀ ਤਸਵੀਰ ਵਾਲੇ ਮੌਜੂਦਾ ਨੋਟ ਅਤੇ ਸਿੱਕੇ ਵੀ ਪ੍ਰਚਲਨ ਵਿੱਚ ਰਹਿਣਗੇ।
ਉਨ੍ਹਾਂ ਕਿਹਾ, ‘ਨਵੀਂ ਲੜੀ ਅਤੇ ਡਿਜ਼ਾਈਨ ਦੇ ਤਹਿਤ, ਨੋਟਾਂ ‘ਤੇ ਕੋਈ ਮਨੁੱਖੀ ਤਸਵੀਰਾਂ ਨਹੀਂ ਹੋਣਗੀਆਂ, ਸਿਰਫ ਕੁਦਰਤੀ ਦ੍ਰਿਸ਼ ਅਤੇ ਰਵਾਇਤੀ ਸਥਾਨ ਪ੍ਰਦਰਸ਼ਿਤ ਕੀਤੇ ਜਾਣਗੇ।’ ਬੰਗਲਾਦੇਸ਼ ਬੈਂਕ ਵੱਲੋਂ ਜਾਰੀ ਕੀਤੇ ਗਏ ਨਵੇਂ ਨੋਟਾਂ ‘ਤੇ ਹਿੰਦੂ ਅਤੇ ਬੋਧੀ ਮੰਦਰਾਂ ਦੇ ਨਾਲ-ਨਾਲ ਇਤਿਹਾਸਕ ਮਹਿਲਾਂ ਦੀਆਂ ਤਸਵੀਰਾਂ ਵੀ ਹੋਣਗੀਆਂ।
ਦੱਸ ਦਈਏ ਕਿ ਇਹ ਪਹਿਲੀ ਵਾਰ ਨਹੀਂ ਹੈ ਜਦੋਂ ਬੰਗਲਾਦੇਸ਼ ਦੀ ਬਦਲਦੀ ਰਾਜਨੀਤੀ ਦੇ ਚਲਦਿਆਂ ਨੋਟਾਂ ਦੇ ਡਿਜ਼ਾਈਨ ਨੂੰ ਸੋਧਿਆ ਗਿਆ ਹੈ। ਜਦੋਂ ਖਾਲਿਦਾ ਜ਼ਿਆ ਦੀ ਅਗਵਾਈ ਵਾਲੀ ਬੰਗਲਾਦੇਸ਼ ਨੈਸ਼ਨਲਿਸਟ ਪਾਰਟੀ (BNP) ਸੱਤਾ ਵਿੱਚ ਸੀ, ਤਾਂ ਉਸ ਸਮੇ ਨੋਟਾਂ ਵਿੱਚ ਇਤਿਹਾਸਕ ਅਤੇ ਪੁਰਾਤੱਤਵ ਸਥਾਨਾਂ ਨੂੰ ਦਰਸਾਇਆ ਗਿਆ ਸੀ।
