ਸੀਨੀਅਰ ਪੱਤਰਕਾਰ ਸੰਤ ਸਿੰਘ ਨਮਿੱਤ ਅੰਤਿਮ ਅਰਦਾਸ
ਪਰਿਵਾਰਕ ਰਿਸ਼ਤੇਦਾਰਾਂ, ਸਨੇਹੀਆਂ ਤੇ ਪੱਤਰਕਾਰ ਭਾਈਚਾਰੇ ਵੱਲੋਂ ਸ਼ਰਧਾਂਜਲੀ ਭੇਂਟ
ਚੰਡੀਗੜ੍ਹ/ਮੁਹਾਲੀ, 8 ਸਤੰਬਰ
ਸੀਨੀਅਰ ਪੱਤਰਕਾਰ ਸੰਤ ਸਿੰਘ ਧਾਲੀਵਾਲ ਨਮਿੱਤ ਪਾਠ ਦਾ ਭੋਗ ਤੇ ਅੰਤਿਮ ਅਰਦਾਸ ਅੱਜ ਮੁਹਾਲੀ ਦੇ ਫੇਜ਼ 5 ਸਥਿਤ ਗੁਰਦੁਆਰਾ ਸ੍ਰੀ ਗੁਰੂ ਤੇਗ ਬਹਾਦਰ ਸਾਹਿਬ ਵਿਖੇ ਹੋਈ। ਇਸ ਮੌਕੇ ਉਨ੍ਹਾਂ ਦੇ ਪਰਿਵਾਰਕ ਰਿਸ਼ਤੇਦਾਰ, ਸਨੇਹੀ ਤੇ ਪੱਤਰਕਾਰ ਭਾਈਚਾਰਾ ਜੁੜਿਆ ਜਿਨ੍ਹਾਂ ਵਿਛੜੀ ਹੋਈ ਰੂਹ ਨੂੰ ਯਾਦ ਕਰਦਿਆਂ ਸ਼ਰਧਾਂਜਲੀ ਭੇਂਟ ਕੀਤੀ।
ਸਾਬਕਾ ਆਈ ਏ ਐਸ ਅਧਿਕਾਰੀ ਕੁਲਬੀਰ ਸਿੰਘ ਸਿੱਧੂ ਨੇ ਸ਼ਰਧਾਂਜਲੀ ਭੇਂਟ ਕਰਦਿਆਂ ਦੱਸਿਆ ਕਿ ਸੰਤ ਸਿੰਘ ਦਾ ਪਿੰਡ ਬਠਿੰਡਾ ਜ਼ਿਲੇ ਵਿੱਚ ਬਹਿਣੀਵਾਲ ਤੇ ਮੇਰਾ ਪਿੰਡ ਉਨ੍ਹਾਂ ਦੇ ਗੁਆਂਢ ਵਿੱਚ ਚੱਕ ਖੜਕ ਸਿੰਘ ਹੋਣ ਕਰਕੇ ਮੇਰੀ ਸਾਂਝ ਕਾਲਜ ਦੇ ਦਿਨਾਂ ਤੋਂ ਸੀ। ਉਨ੍ਹਾਂ ਸੰਤ ਸਿੰਘ ਨਾਲ ਜੁੜੀਆਂ ਯਾਦਾਂ ਸਾਂਝੀਆਂ ਕਰਦਿਆਂ ਉਸ ਨੂੰ ਦਰਵੇਸ਼ ਇਨਸਾਨ ਤੇ ਪ੍ਰਤੀਬੱਧ ਪੱਤਰਕਾਰ ਦੱਸਿਆ। ਉਨ੍ਹਾਂ ਕਿਹਾ ਕਿ ਅੱਜ ਦੇ ਸਮੇਂ ਵਿੱਚ ਸੰਤ ਸਿੰਘ ਜਿਹੇ ਇਨਸਾਨ ਵਿਰਲੇ ਹੀ ਮਿਲਦੇ ਹਨ।
ਪੱਤਰਕਾਰ ਭਾਈਚਾਰੇ ਵੱਲੋਂ ਸ਼ਰਧਾਂਜਲੀ ਭੇਂਟ ਕਰਦਿਆਂ ਸੀਨੀਅਰ ਪੱਤਰਕਾਰ ਸਤਿੰਦਰ ਸਿੰਘ ਬੈਂਸ ਨੇ ਕਿਹਾ ਕਿ ਸੰਤ ਸਿੰਘ ਸੁਭਾਅ ਦਾ ਵੀ ਸੰਤ ਇਨਸਾਨ ਸੀ ਜਿਸ ਨੇ ਹਲੀਮੀ ਨਾਲ ਜ਼ਿੰਦਗੀ ਜਿਉਈ। ਉਨ੍ਹਾਂ ਕਿਹਾ ਕਿ ਸੰਤ ਸਿੰਘ ਨੇ ਪੱਤਰਕਾਰੀ ਖੇਤਰ ਵਿੱਚ ਜਿੱਥੇ ਮਾਅਰਕੇ ਮਾਰੇ ਉੱਥੇ ਚੰਡੀਗੜ੍ਹ ਪ੍ਰੈਸ ਕਲੱਬ ਨੂੰ ਖੜ੍ਹਾ ਕਰਨ ਵਿੱਚ ਮੋਢੀ ਮੈਂਬਰ ਵਜੋਂ ਪੂਰਾ ਯੋਗਦਾਨ ਪਾਇਆ।ਅੰਤ ਵਿੱਚ ਉਨ੍ਹਾਂ ਆਈਆਂ ਸਾਰੀਆਂ ਸ਼ਖ਼ਸੀਅਤਾਂ ਦਾ ਧੰਨਵਾਦ ਕੀਤਾ।
ਇਸ ਮੌਕੇ ਪਰਿਵਾਰ ਵੱਲੋਂ ਸੰਤ ਸਿੰਘ ਦੀ ਭੈਣ ਮਹਿੰਦਰ ਕੌਰ ਤੇ ਉਨ੍ਹਾਂ ਦਾ ਪੋਤਰਾ ਗੁਰਵਿੰਦਰ ਸਿੰਘ, ਆਈ ਏ ਐਸ (ਸੇਵਾ ਮੁਕਤ) ਮਨੋਹਰ ਸਿੰਘ ਚਾਂਦਲਾ, ਚੀਫ ਇੰਜਨੀਅਰ (ਸੇਵਾ ਮੁਕਤ) ਐਮ ਐਸ ਸਿੱਧੂ, ਪੱਤਰਕਾਰ ਭਾਈਚਾਰੇ ਵੱਲੋਂ ਜਗਤਾਰ ਸਿੰਘ, ਸਰਬਜੀਤ ਸਿੰਘ ਧਾਲੀਵਾਲ, ਬਲਜੀਤ ਸਿੰਘ ਬੱਲੀ, ਦਵਿੰਦਰਜੀਤ ਸਿੰਘ ਦਰਸ਼ੀ ਤੇ ਵੀ ਕੇ ਸ਼ਰਮਾ ਅਤੇ ਪੰਜਾਬ ਸਰਕਾਰ ਤਰਫੋਂ ਪੰਜਾਬ ਪਬਲਿਕ ਰਿਲੇਸ਼ਨਜ਼ ਅਫਸਰਜ਼ ਐਸੋਸੀਏਸ਼ਨ ਦੇ ਪ੍ਰਧਾਨ ਨਵਦੀਪ ਸਿੰਘ ਗਿੱਲ (ਪੀ ਆਰ ਓ) ਹਾਜ਼ਰ ਸਨ।
———
