IPL 2027: ਹਾਰਦਿਕ ਪੰਡਯਾ ਪੰਜਾਬ ਕਿੰਗਜ਼ ’ਚ ਸ਼ਾਮਲ, ਹੁਣ ਅਰਸ਼ਦੀਪ ਸਿੰਘ ਮੁੰਬਈ ਇੰਡੀਅਨਜ਼ ਵੱਲੋਂ ਖੇਡਣਗੇ
– 18 ਕਰੋੜ ਰੁਪਏ ਵਿੱਚ ਹੋਇਆ ਦੋਵਾਂ ਟੀਮਾਂ ਵਿਚਾਲੇ ਖਿਡਾਰੀਆਂ ਦਾ ਅਦਲਾ-ਬਦਲੀ ਸੌਦਾ
ਚੰਡੀਗੜ੍ਹ, 11 ਨਵੰਬਰ (ਵਿਸ਼ਵ ਵਾਰਤਾ): ਇੰਡੀਅਨ ਪ੍ਰੀਮੀਅਰ ਲੀਗ (IPL) 2027 ਤੋਂ ਪਹਿਲਾਂ ਮੁੰਬਈ ਇੰਡੀਅਨਜ਼ ਅਤੇ ਪੰਜਾਬ ਕਿੰਗਜ਼ ਵਿਚਾਲੇ ਵੱਡਾ ਖਿਡਾਰੀ ਟ੍ਰੇਡ ਹੋਇਆ ਹੈ। ਇਸ ਸੌਦੇ ਤਹਿਤ ਮੁੰਬਈ ਦੇ ਕਪਤਾਨ ਹਾਰਦਿਕ ਪੰਡਯਾ ਹੁਣ ਪੰਜਾਬ ਕਿੰਗਜ਼ ਵੱਲੋਂ ਖੇਡਣਗੇ, ਜਦਕਿ ਭਾਰਤੀ ਟੀਮ ਦੇ ਤੇਜ਼ ਗੇਂਦਬਾਜ਼ ਅਰਸ਼ਦੀਪ ਸਿੰਘ ਮੁੰਬਈ ਇੰਡੀਅਨਜ਼ ਵਿੱਚ ਸ਼ਾਮਲ ਹੋਣਗੇ।
ਸੌਦੇ ਅਨੁਸਾਰ ਹਾਰਦਿਕ ਪੰਡਯਾ ਨੂੰ ਪੰਜਾਬ ਕਿੰਗਜ਼ 18 ਕਰੋੜ ਰੁਪਏ ਦੀ ਫੀਸ ’ਤੇ ਆਪਣੀ ਟੀਮ ਵਿੱਚ ਲਿਆਵੇਗੀ। ਇਸ ਤੋਂ ਪਹਿਲਾਂ ਉਨ੍ਹਾਂ ਦੀ ਫੀਸ 16.35 ਕਰੋੜ ਰੁਪਏ ਸੀ। ਦੂਜੇ ਪਾਸੇ ਅਰਸ਼ਦੀਪ ਸਿੰਘ ਮੁੰਬਈ ਇੰਡੀਅਨਜ਼ ਨਾਲ ਆਪਣੀ ਮੌਜੂਦਾ 18 ਕਰੋੜ ਰੁਪਏ ਦੀ ਫੀਸ ’ਤੇ ਜੁੜਨਗੇ।
ਹਾਰਦਿਕ ਨੂੰ ਟੀਮ ਵਿੱਚ ਸ਼ਾਮਲ ਕਰਨ ਦੀ ਦੌੜ ਵਿੱਚ ਕੋਲਕਾਤਾ ਨਾਈਟ ਰਾਈਡਰਜ਼, ਰਾਜਸਥਾਨ ਰਾਇਲਜ਼ ਅਤੇ ਲਖਨਊ ਸੁਪਰ ਜਾਇੰਟਸ ਵੀ ਸ਼ਾਮਲ ਸਨ। ਹਾਲਾਂਕਿ ਪੰਜਾਬ ਕਿੰਗਜ਼ ਨੇ ਇਸ ਦੌੜ ਵਿੱਚ ਬਾਜ਼ੀ ਮਾਰ ਲਈ। 17 ਨਵੰਬਰ ਦੀ ਰਿਟੇਨਸ਼ਨ ਸਮਾਂ-ਸੀਮਾ ਤੋਂ ਪਹਿਲਾਂ ਪਿਛਲੇ ਹਫ਼ਤੇ ਹੀ ਇਸ ਸੌਦੇ ਦੀ ਕਾਗਜ਼ੀ ਕਾਰਵਾਈ ਪੂਰੀ ਕਰ ਲਈ ਗਈ ਹੈ।
ਹਾਰਦਿਕ ਪੰਡਯਾ ਦਾ ਮੁੰਬਈ ਇੰਡੀਅਨਜ਼ ਨਾਲ ਦੂਜਾ ਕਾਰਜਕਾਲ ਇਸ ਟ੍ਰੇਡ ਨਾਲ ਖ਼ਤਮ ਹੋ ਗਿਆ ਹੈ। ਉਹ ਪਹਿਲੀ ਵਾਰ 2015 ਵਿੱਚ ਮੁੰਬਈ ਦੀ ਟੀਮ ਨਾਲ ਜੁੜੇ ਸਨ ਅਤੇ 2015, 2017, 2019 ਤੇ 2020 ਵਿੱਚ ਟੀਮ ਦੀ ਖ਼ਿਤਾਬੀ ਜਿੱਤ ਦਾ ਹਿੱਸਾ ਰਹੇ। ਸੱਤ ਸੀਜ਼ਨ ਮੁੰਬਈ ਨਾਲ ਬਿਤਾਉਣ ਤੋਂ ਬਾਅਦ ਉਹ 2022 ਵਿੱਚ ਗੁਜਰਾਤ ਟਾਈਟਨਜ਼ ਨਾਲ ਜੁੜੇ ਅਤੇ ਪਹਿਲੇ ਹੀ ਸੀਜ਼ਨ ਵਿੱਚ ਟੀਮ ਨੂੰ ਚੈਂਪੀਅਨ ਬਣਾਇਆ। ਗੁਜਰਾਤ ਨੇ 2023 ਵਿੱਚ ਵੀ ਫਾਈਨਲ ਖੇਡਿਆ ਸੀ। 2024 ਵਿੱਚ ਹਾਰਦਿਕ ਮੁੜ ਮੁੰਬਈ ਆਏ ਅਤੇ ਟੀਮ ਦੀ ਕਪਤਾਨੀ ਸੰਭਾਲੀ। ਆਈਪੀਐਲ ਦੇ 162 ਮੈਚਾਂ ਵਿੱਚ ਉਹ 2,955 ਦੌੜਾਂ ਬਣਾਉਣ ਦੇ ਨਾਲ 82 ਵਿਕਟਾਂ ਵੀ ਹਾਸਲ ਕਰ ਚੁੱਕੇ ਹਨ।
ਅਰਸ਼ਦੀਪ ਸਿੰਘ 2019 ਵਿੱਚ ਪੰਜਾਬ ਕਿੰਗਜ਼ ਨਾਲ ਜੁੜੇ ਸਨ ਅਤੇ ਇਸੇ ਟੀਮ ਵੱਲੋਂ ਉਨ੍ਹਾਂ ਨੇ ਆਈਪੀਐਲ ਵਿੱਚ ਆਪਣਾ ਡੈਬਿਊ ਕੀਤਾ ਸੀ। ਅੱਠ ਸੀਜ਼ਨ ਬਿਤਾਉਣ ਤੋਂ ਬਾਅਦ ਹੁਣ ਉਹ ਮੁੰਬਈ ਇੰਡੀਅਨਜ਼ ਦੀ ਜਰਸੀ ਵਿੱਚ ਨਜ਼ਰ ਆਉਣਗੇ। ਅਰਸ਼ਦੀਪ ਪੰਜਾਬ ਕਿੰਗਜ਼ ਦੇ ਸਭ ਤੋਂ ਵੱਧ ਵਿਕਟਾਂ ਲੈਣ ਵਾਲੇ ਗੇਂਦਬਾਜ਼ ਹਨ। ਉਨ੍ਹਾਂ ਨੇ 96 ਆਈਪੀਐਲ ਮੈਚਾਂ ਵਿੱਚ 111 ਵਿਕਟਾਂ ਆਪਣੇ ਨਾਮ ਕੀਤੀਆਂ ਹਨ। ਨਵੀਂ ਗੇਂਦ ਨਾਲ ਸ਼ੁਰੂਆਤੀ ਵਿਕਟਾਂ ਲੈਣ ਅਤੇ ਆਖ਼ਰੀ ਓਵਰਾਂ ਵਿੱਚ ਦਬਾਅ ਹੇਠ ਗੇਂਦਬਾਜ਼ੀ ਕਰਨ ਦੀ ਸਮਰੱਥਾ ਉਨ੍ਹਾਂ ਨੂੰ ਖ਼ਾਸ ਬਣਾਉਂਦੀ ਹੈ। ਉਨ੍ਹਾਂ ਨੇ 2025 ਦੇ ਸੀਜ਼ਨ ਵਿੱਚ 21 ਅਤੇ 2026 ਵਿੱਚ 14 ਵਿਕਟਾਂ ਹਾਸਲ ਕੀਤੀਆਂ। ਖੱਬੇ ਹੱਥ ਨਾਲ ਤੇਜ਼ ਗੇਂਦਬਾਜ਼ੀ ਕਰਨ ਵਾਲੇ ਅਰਸ਼ਦੀਪ ਦੇ ਮੁੰਬਈ ਨਾਲ ਜੁੜਨ ਨਾਲ ਟੀਮ ਦੇ ਗੇਂਦਬਾਜ਼ੀ ਹਮਲੇ ਨੂੰ ਮਜ਼ਬੂਤੀ ਮਿਲਣ ਦੀ ਉਮੀਦ ਹੈ।
