Australia: ਸਾਬਕਾ ਕੈਥੋਲਿਕ ਬਿਸ਼ਪ ਨੂੰ ਜਿਨਸੀ ਸ਼ੋਸ਼ਣ ਮਾਮਲੇ ’ਚ ਸਾਢੇ 6 ਸਾਲ ਦੀ ਜੇਲ੍ਹ
ਨਵੀਂ ਦਿੱਲੀ, 8 ਅਕਤੂਬਰ 2026 (ਵਿਸ਼ਵ ਵਾਰਤਾ/ਗੁਰਪੁਨੀਤ ਸਿੱਧੂ): ਆਸਟ੍ਰੇਲੀਆ ਦੇ ਸਾਬਕਾ ਕੈਥੋਲਿਕ ਬਿਸ਼ਪ ਕ੍ਰਿਸਟੋਫਰ ਸਾਂਡਰਸ (76) ਨੂੰ ਦੋ ਆਦਿਵਾਸੀ ਨੌਜਵਾਨ ਦੇ ਜਿਨਸੀ ਸ਼ੋਸ਼ਣ ਦੇ ਮਾਮਲੇ ਵਿੱਚ 6 ਸਾਲ 6 ਮਹੀਨੇ ਦੀ ਕੈਦ ਦੀ ਸਜ਼ਾ ਸੁਣਾਈ ਗਈ ਹੈ। ਵੈਸਟਰਨ ਆਸਟ੍ਰੇਲੀਆ ਦੀ ਜ਼ਿਲ੍ਹਾ ਅਦਾਲਤ ਨੇ ਬੁੱਧਵਾਰ ਨੂੰ ਇਹ ਸਜ਼ਾ ਸੁਣਾਈ।
ਸਾਂਡਰਸ ਨੂੰ ਅਗਸਤ ਵਿੱਚ 2008 ਤੋਂ 2019 ਦਰਮਿਆਨ ਹੋਏ ਜਿਨਸੀ ਸ਼ੋਸ਼ਣ ਨਾਲ ਸਬੰਧਤ 19 ਵਿੱਚੋਂ 13 ਦੋਸ਼ਾਂ ਵਿੱਚ ਦੋਸ਼ੀ ਠਹਿਰਾਇਆ ਗਿਆ ਸੀ। ਉਹ ਵੈਸਟਰਨ ਆਸਟ੍ਰੇਲੀਆ ਦੇ ਦੂਰ-ਦੁਰਾਡੇ ਬਰੂਮ ਡਾਇਓਸੀਜ਼ ਦੇ ਬਿਸ਼ਪ ਰਹੇ ਸਨ। ਉਨ੍ਹਾਂ ਨੂੰ ਫਰਵਰੀ 2031 ਵਿੱਚ ਪੈਰੋਲ ਲਈ ਯੋਗ ਮੰਨਿਆ ਜਾਵੇਗਾ। ਅਦਾਲਤ ਨੇ ਇੱਕ ਤੀਜੇ ਸ਼ਿਕਾਇਤਕਰਤਾ ਨਾਲ ਸਬੰਧਤ ਛੇ ਦੋਸ਼ਾਂ ਤੋਂ ਸਾਂਡਰਸ ਨੂੰ ਬਰੀ ਕਰ ਦਿੱਤਾ। ਮੁਕੱਦਮੇ ਦੌਰਾਨ 13 ਸਾਲ ਤੋਂ ਘੱਟ ਉਮਰ ਦੇ ਇੱਕ ਬੱਚੇ ਨਾਲ ਸਬੰਧਤ ਚਾਰ ਦੋਸ਼ ਵੀ ਵਾਪਸ ਲੈ ਲਏ ਗਏ ਸਨ।
ਇਹ ਮਾਮਲਾ ਆਸਟ੍ਰੇਲੀਆ ਵਿੱਚ ਕੈਥੋਲਿਕ ਚਰਚ ਨਾਲ ਜੁੜੇ ਜਿਨਸੀ ਸ਼ੋਸ਼ਣ ਦੇ ਮਾਮਲਿਆਂ ਵਿੱਚ ਸਭ ਤੋਂ ਸੀਨੀਅਰ ਪੱਧਰ ਦੇ ਦੋਸ਼ਾਂ ਵਿੱਚੋਂ ਇੱਕ ਹੈ। ਇਸਤਗਾਸਾ ਪੱਖ ਨੇ ਦੋਸ਼ ਲਗਾਇਆ ਸੀ ਕਿ ਸਾਂਡਰਸ ਚਰਚ ਦੀ ਮਲਕੀਅਤ ਵਾਲੇ ਘਰ ਵਿੱਚ ਨੌਜਵਾਨ ਆਦਿਵਾਸੀ ਪੁਰਸ਼ਾਂ ਨੂੰ ਸ਼ਰਾਬ ਅਤੇ ਸਿਗਰਟਾਂ ਦੇ ਕੇ ਲੁਭਾਉਂਦੇ ਸਨ, ਜਿਨ੍ਹਾਂ ਦਾ ਖਰਚਾ ਕਥਿਤ ਤੌਰ ’ਤੇ ਚਰਚ ਦੇ ਫੰਡਾਂ ਵਿੱਚੋਂ ਕੀਤਾ ਜਾਂਦਾ ਸੀ।
ਸਾਂਡਰਸ ਨੇ 1996 ਤੋਂ 2021 ਤੱਕ ਬਰੂਮ ਡਾਇਓਸੀਜ਼ ਦੀ ਅਗਵਾਈ ਕੀਤੀ। ਇਹ ਖੇਤਰ ਫਰਾਂਸ ਨਾਲੋਂ ਵੀ ਵੱਡਾ ਹੈ ਅਤੇ ਇੱਥੇ ਕਰੀਬ 50,000 ਲੋਕ ਰਹਿੰਦੇ ਹਨ। ਇਸ ਖੇਤਰ ਦੇ ਜ਼ਿਆਦਾਤਰ ਕੈਥੋਲਿਕ ਆਦਿਵਾਸੀ ਭਾਈਚਾਰੇ ਨਾਲ ਸਬੰਧਤ ਹਨ।
ਆਸਟ੍ਰੇਲੀਅਨ ਕੈਥੋਲਿਕ ਬਿਸ਼ਪ ਕਾਨਫਰੰਸ ਦੇ ਪ੍ਰਧਾਨ ਆਰਚਬਿਸ਼ਪ ਟਿਮੋਥੀ ਕੋਸਟੇਲੋ ਨੇ ਕਿਹਾ ਕਿ ਸਜ਼ਾ ਨੇ ਸਾਂਡਰਸ ਦੇ ਅਪਰਾਧਾਂ ਦੀ ਗੰਭੀਰਤਾ ਅਤੇ ਪੀੜਤਾਂ ’ਤੇ ਪਏ ਡੂੰਘੇ ਪ੍ਰਭਾਵ ਨੂੰ ਦਰਸਾਇਆ ਹੈ। ਉਨ੍ਹਾਂ ਨੇ ਪੀੜਤਾਂ ਤੋਂ ਮੁਆਫ਼ੀ ਮੰਗਦਿਆਂ ਕਿਹਾ ਕਿ ਚਰਚ ਦੇ ਆਗੂ ਵੱਲੋਂ ਉਨ੍ਹਾਂ ਦੇ ਭਰੋਸੇ ਨਾਲ ਕੀਤਾ ਗਿਆ ਵਿਸ਼ਵਾਸਘਾਤ ਬਹੁਤ ਗੰਭੀਰ ਸੀ।
ਵੈਟੀਕਨ ਨੇ 2022 ਵਿੱਚ ਸਾਂਡਰਸ ਖ਼ਿਲਾਫ਼ ਜਾਂਚ ਸ਼ੁਰੂ ਕੀਤੀ ਸੀ ਅਤੇ ਅਗਲੇ ਸਾਲ ਆਪਣੀ ਜਾਂਚ ਦੀ ਰਿਪੋਰਟ ਵੈਸਟਰਨ ਆਸਟ੍ਰੇਲੀਆ ਪੁਲਿਸ ਨੂੰ ਸੌਂਪੀ ਸੀ। ਪੁਲਿਸ ਨੇ 2024 ਵਿੱਚ ਸਾਂਡਰਸ ਨੂੰ ਗ੍ਰਿਫ਼ਤਾਰ ਕਰਕੇ ਦੋਸ਼ ਲਗਾਏ ਸਨ।
ਹੋਰ ਖਬਰਾਂ ਪੜ੍ਹਨ ਲਈ ਦਿੱਤੇ ਗਏ ਲਿੰਕ ਤੇ ਕਲਿੱਕ ਕਰੋ : https://wishavwarta.in/
