National: RBI ਗਵਰਨਰ ਦੀ ਚੇਤਾਵਨੀ: ਭਵਿੱਖ ’ਚ ਵਧ ਸਕਦੈ ਵਿੱਤੀ ਸੰਕਟ ਦਾ ਖ਼ਤਰਾ
ਚੰਡੀਗੜ੍ਹ, 4 ਅਕਤੂਬਰ (ਵਿਸ਼ਵ ਵਾਰਤਾ): ਪੱਛਮੀ ਏਸ਼ੀਆ ’ਚ ਜਾਰੀ ਤਣਾਅ ਦੇ ਬਾਵਜੂਦ ਭਾਰਤ ਦੀ ਵਿੱਤੀ ਪ੍ਰਣਾਲੀ ਇਸ ਸਮੇਂ ਮਜ਼ਬੂਤ ਸਥਿਤੀ ’ਚ ਹੈ। ਹਾਲਾਂਕਿ, ਰਿਜ਼ਰਵ ਬੈਂਕ ਆਫ਼ ਇੰਡੀਆ (RBI) ਦੇ ਗਵਰਨਰ ਸੰਜੇ ਮਲਹੋਤਰਾ ਨੇ ਭਵਿੱਖ ਦੇ ਸੰਭਾਵਿਤ ਖ਼ਤਰਿਆਂ ਨੂੰ ਲੈ ਕੇ ਚੌਕਸ ਰਹਿਣ ਦੀ ਲੋੜ ਦੱਸੀ ਹੈ। ਕੌਟਿਲਯ ਆਰਥਿਕ ਸੰਮੇਲਨ ’ਚ ਬੋਲਦਿਆਂ ਮਲਹੋਤਰਾ ਨੇ ਕਿਹਾ ਕਿ ਮੌਜੂਦਾ ਮਜ਼ਬੂਤ ਵਿੱਤੀ ਸਥਿਤੀ ਇਸ ਗੱਲ ਦੀ ਗਾਰੰਟੀ ਨਹੀਂ ਦਿੰਦੀ ਕਿ ਭਵਿੱਖ ’ਚ ਕੋਈ ਖ਼ਤਰਾ ਨਹੀਂ ਆਵੇਗਾ। ਲੰਬੇ ਸਮੇਂ ਤੱਕ ਆਰਥਿਕ ਸਥਿਰਤਾ ਰਹਿਣ ਨਾਲ ਲੋਕ ਅਤੇ ਵਿੱਤੀ ਸੰਸਥਾਵਾਂ ਵਧੇਰੇ ਜੋਖ਼ਮ ਲੈ ਸਕਦੀਆਂ ਹਨ, ਜਿਸ ਨਾਲ ਕਰਜ਼ੇ ਦਾ ਪੱਧਰ ਵੀ ਵਧ ਸਕਦਾ ਹੈ।
ਉਨ੍ਹਾਂ ਕਿਹਾ ਕਿ ਅਗਲਾ ਵਿੱਤੀ ਸੰਕਟ ਜ਼ਰੂਰੀ ਨਹੀਂ ਕਿ ਕਿਸੇ ਬੈਂਕ ਜਾਂ ਵਿੱਤੀ ਸੰਸਥਾ ਤੋਂ ਹੀ ਸ਼ੁਰੂ ਹੋਵੇ। ਸਾਈਬਰ ਹਮਲੇ, ਭੂ-ਰਾਜਨੀਤਿਕ ਘਟਨਾਵਾਂ, ਤਕਨੀਕੀ ਗੜਬੜਾਂ ਅਤੇ ਇੱਕ ਦੇਸ਼ ਤੋਂ ਦੂਜੇ ਦੇਸ਼ ਤੱਕ ਫੈਲਣ ਵਾਲੇ ਵਿੱਤੀ ਪ੍ਰਭਾਵ ਵੀ ਸੰਕਟ ਦਾ ਕਾਰਨ ਬਣ ਸਕਦੇ ਹਨ। RBI ਗਵਰਨਰ ਮੁਤਾਬਕ ਵਿੱਤੀ ਸਥਿਰਤਾ ਸਿਰਫ਼ ਬੈਂਕਿੰਗ ਖੇਤਰ ਤੱਕ ਸੀਮਿਤ ਨਹੀਂ ਹੈ। ਗੈਰ-ਬੈਂਕਿੰਗ ਵਿੱਤੀ ਕੰਪਨੀਆਂ (NBFC), ਸ਼ੇਅਰ ਬਾਜ਼ਾਰ, ਡਿਜੀਟਲ ਪੇਮੈਂਟ ਸਿਸਟਮ, ਤਕਨੀਕੀ ਬੁਨਿਆਦੀ ਢਾਂਚਾ, ਮਹੱਤਵਪੂਰਨ ਥਰਡ-ਪਾਰਟੀ ਸੇਵਾਵਾਂ ਅਤੇ ਅੰਤਰਰਾਸ਼ਟਰੀ ਵਿੱਤੀ ਨੈੱਟਵਰਕ ਨੂੰ ਵੀ ਮਜ਼ਬੂਤ ਰੱਖਣਾ ਜ਼ਰੂਰੀ ਹੈ।
ਉਨ੍ਹਾਂ ਮੁਤਾਬਕ ਭੂ-ਰਾਜਨੀਤਿਕ ਤਣਾਅ ਨਾਲ ਵਿੱਤੀ ਬਾਜ਼ਾਰਾਂ ’ਤੇ ਦਬਾਅ ਪੈ ਸਕਦਾ ਹੈ, ਜਦਕਿ ਵੱਡੇ ਸਾਈਬਰ ਹਮਲੇ ਜਾਂ ਤਕਨੀਕੀ ਨਾਕਾਮੀ ਬੈਂਕਿੰਗ ਅਤੇ ਆਨਲਾਈਨ ਭੁਗਤਾਨ ਪ੍ਰਣਾਲੀ ਨੂੰ ਪ੍ਰਭਾਵਿਤ ਕਰ ਸਕਦੀ ਹੈ। ਇਸ ਲਈ ਮੌਜੂਦਾ ਮਜ਼ਬੂਤੀ ਦੇ ਨਾਲ-ਨਾਲ ਭਵਿੱਖ ਦੇ ਸੰਭਾਵਿਤ ਖ਼ਤਰਿਆਂ ਲਈ ਵੀ ਵਿੱਤੀ ਪ੍ਰਣਾਲੀ ਨੂੰ ਤਿਆਰ ਰੱਖਣਾ ਜ਼ਰੂਰੀ ਹੈ।
ਹੋਰ ਖਬਰਾਂ ਪੜ੍ਹਨ ਲਈ ਦਿੱਤੇ ਗਏ ਲਿੰਕ ਤੇ ਕਲਿੱਕ ਕਰੋ : https://wishavwarta.in/
