ਮਹਿੰਗਾਈ ਦੀ ਇੱਕ ਹੋਰ ਮਾਰ! ਪੈਟਰੋਲ-ਡੀਜ਼ਲ ਤੇ ਐਲਪੀਜੀ ਤੋਂ ਬਾਅਦ ਹੁਣ ਸੀਐਨਜੀ ਵੀ ਹੋਈ ਮਹਿੰਗੀ
ਨਵੀ ਦਿੱਲੀ, 17 ਮਈ 2026 (ਵਿਸ਼ਵ ਵਾਰਤਾ): ਪੈਟਰੋਲ-ਡੀਜ਼ਲ, ਐਲਪੀਜੀ ਅਤੇ ਦੁੱਧ ਤੋਂ ਬਾਅਦ ਹੁਣ ਸੀਐਨਜੀ (ਕੰਪਰੈੱਸਡ ਨੈਚੁਰਲ ਗੈਸ) ਦੀਆਂ ਕੀਮਤਾਂ ਵੀ ਵਧ ਚੁੱਕੀਆਂ ਹਨ। ਸ਼ਨੀਵਾਰ ਰਾਤ ਤੋਂ ਸੀਐਨਜੀ ਦੀ ਕੀਮਤ ਵਿੱਚ ਲਗਭਗ 3 ਰੁਪਏ ਪ੍ਰਤੀ ਕਿੱਲੋ ਤੱਕ ਦਾ ਵਾਧਾ ਕੀਤਾ ਗਿਆ ਹੈ, ਅਤੇ ਇਹ ਨਵੀਆਂ ਕੀਮਤਾਂ ਅੱਜ ਤੋਂ ਲਾਗੂ ਹੋ ਗਈਆਂ ਹਨ। ਅਚਾਨਕ ਹੋਏ ਇਸ ਵਾਧੇ ਕਾਰਨ ਟੈਕਸੀ, ਆਟੋ ਅਤੇ ਨਿੱਜੀ ਵਾਹਨ ਚਾਲਕਾਂ ਵਿੱਚ ਹਲਚਲ ਮਚ ਗਈ ਹੈ।
ਭੋਪਾਲ ਵਿੱਚ 1 ਕਿੱਲੋ ਗੈਸ ਦੀ ਕੀਮਤ ਹੁਣ 93.75 ਰੁਪਏ ਹੋ ਗਈ ਹੈ। ਦੱਸ ਦਈਏ ਕਿ 3 ਗੈਸ ਏਜੰਸੀਆਂ- ਥਿੰਕ (Think), ਗੇਲ (GAIL) ਅਤੇ ਅਵੰਤਿਕਾ (Avantika) ਸੀਐਨਜੀ ਦੀ ਸਪਲਾਈ ਕਰਦੀਆਂ ਹਨ। ਭੋਪਾਲ, ਸੀਹੋਰ, ਰਾਜਗੜ੍ਹ, ਵਿਦਿਸ਼ਾ ਸਮੇਤ ਆਸ-ਪਾਸ ਦੇ ਜ਼ਿਲ੍ਹਿਆਂ ਵਿੱਚ ਥਿੰਕ ਕੰਪਨੀ ਸਪਲਾਈ ਕਰਦੀ ਹੈ, ਜਦਕਿ ਇੰਦੌਰ, ਉੱਜੇਨ, ਗਵਾਲੀਅਰ ਡਿਵੀਜ਼ਨ (ਸੰਭਾਗ) ਵਿੱਚ ਅਵੰਤਿਕਾ ਦੀ ਸਪਲਾਈ ਹੈ।
ਇਸ ਦੇ ਨਾਲ ਹੀ ਦਿੱਲੀ ਵਿੱਚ ਮਹਿਜ਼ ਤਿੰਨ ਦਿਨਾਂ ਦੇ ਅੰਦਰ ਸੀਐਨਜੀ ਦੀਆਂ ਕੀਮਤਾਂ ਵਿੱਚ ਦੋ ਵਾਰ ਵਾਧਾ ਦਰਜ ਕੀਤਾ ਗਿਆ ਹੈ। 15 ਮਈ ਨੂੰ 2 ਰੁਪਏ ਅਤੇ ਅੱਜ 17 ਮਈ 2026 ਨੂੰ 1 ਰੁਪਏ ਪ੍ਰਤੀ ਕਿੱਲੋ ਦਾ ਵਾਧਾ ਦਰਜ ਕੀਤਾ ਗਿਆ ਹੈ।
ਮਿਲੀ ਜਾਣਕਾਰੀ ਅਨੁਸਾਰ ਸੀਐਨਜੀ ਸਪਲਾਈ ਕਰਨ ਵਾਲੀ ਪ੍ਰਮੁੱਖ ਕੰਪਨੀ ‘ਥਿੰਕ ਗੈਸ’ ਨੇ ਪੰਜਾਬ ਦੇ ਕਈ ਹਿੱਸਿਆਂ ਵਿੱਚ ਵੀ ਕੀਮਤਾਂ ਵਿੱਚ ਸਿੱਧਾ 2 ਰੁਪਏ ਪ੍ਰਤੀ ਕਿੱਲੋਗ੍ਰਾਮ ਦਾ ਵਾਧਾ ਕਰ ਦਿੱਤਾ ਹੈ। ਵਧੀਆਂ ਹੋਈਆਂ ਕੀਮਤਾਂ ਬੀਤੀ ਰਾਤ ਤੋਂ ਹੀ ਲਾਗੂ ਹੋ ਚੁੱਕੀਆਂ ਹਨ। ਇਸ ਵਾਧੇ ਤੋਂ ਪਹਿਲਾਂ ਲੁਧਿਆਣਾ ਵਿੱਚ ਥਿੰਕ ਸੀਐਨਜੀ ਦਾ ਰੇਟ 86.75 ਰੁਪਏ ਪ੍ਰਤੀ ਕਿੱਲੋਗ੍ਰਾਮ ਸੀ, ਜੋ ਹੁਣ ਵਧ ਕੇ 88.75 ਰੁਪਏ ਪ੍ਰਤੀ ਕਿੱਲੋਗ੍ਰਾਮ ‘ਤੇ ਪਹੁੰਚ ਗਿਆ ਹੈ। ਦੱਸ ਦਈਏ ਕਿ ਆਮ ਜਨਤਾ ‘ਤੇ ਮਹਿੰਗਾਈ ਦੀ ਚੌਤਰਫਾ ਮਾਰ ਪਈ ਹੈ। ਇਸ ਤੋਂ ਪਹਿਲਾ 15 ਮਈ ਨੂੰ ਪੈਟਰੋਲ ਅਤੇ ਡੀਜ਼ਲ ਦੀਆਂ ਕੀਮਤਾਂ ਵਿੱਚ 3 ਰੁਪਏ ਦਾ ਵਾਧਾ ਕੀਤਾ ਗਿਆ ਸੀ।
