America ਲੈਂਡਿੰਗ ਦੌਰਾਨ ਇੱਕ ਖੰਭੇ ਅਤੇ ਟਰੱਕ ਨਾਲ ਟਕਰਾਇਆ ਜਹਾਜ਼; 231 ਯਾਤਰੀਆਂ ਦੇ ਅਟਕੇ ਸਾਹ!
ਅਮਰੀਕਾ, 4 ਮਈ 2026 (ਵਿਸ਼ਵ ਵਾਰਤਾ): ਅਮਰੀਕਾ ਵਿੱਚ ਇੱਕ ਵੱਡਾ ਹਾਦਸਾ ਹੁੰਦੇ-ਹੁੰਦੇ ਬਚ ਗਿਆ । ਯੂਨਾਈਟਿਡ ਏਅਰਲਾਈਨਜ਼ ਦਾ ਇੱਕ ਜਹਾਜ਼ ਲੈਂਡਿੰਗ ਵੇਲੇ ਹਾਈਵੇਅ ‘ਤੇ ਇੱਕ ਖੰਭੇ ਅਤੇ ਟਰੱਕ ਨਾਲ ਟਕਰਾ ਗਿਆ। ਜਦੋਂ ਜਹਾਜ਼ ਨਾਲ ਇਹ ਦੁਰਘਟਨਾ ਹੋਈ, ਉਦੋਂ ਉਸ ਵਿੱਚ 231 ਯਾਤਰੀ ਅਤੇ ਕਰੂ ਮੈਂਬਰ ਸਵਾਰ ਸਨ।
ਨਿਊਜ਼ ਏਜੰਸੀ AFP ਦੀ ਰਿਪੋਰਟ ਅਨੁਸਾਰ, ਫੈਡਰਲ ਐਵੀਏਸ਼ਨ ਐਡਮਿਨਿਸਟ੍ਰੇਸ਼ਨ (FAA) ਨੇ ਦੱਸਿਆ ਕਿ ਇਹ ਬੋਇੰਗ 767 ਜਹਾਜ਼ ਇਟਲੀ ਦੇ ਵੇਨਿਸ ਤੋਂ ਆ ਰਿਹਾ ਸੀ ਅਤੇ ਰਾਹਤ ਦੀ ਗੱਲ ਇਹ ਰਹੀ ਕਿ ਇਹ ਨਿਊਆਰਕ ਲਿਬਰਟੀ ਇੰਟਰਨੈਸ਼ਨਲ ਏਅਰਪੋਰਟ ‘ਤੇ ਸੁਰੱਖਿਅਤ ਉਤਰ ਗਿਆ। ਏਜੰਸੀ ਇਸ ਘਟਨਾ ਦੀ ਜਾਂਚ ਕਰੇਗੀ।
ਨਿਊ ਜਰਸੀ ਸਟੇਟ ਪੁਲਿਸ ਦੀ ਸ਼ੁਰੂਆਤੀ ਜਾਂਚ ਵਿੱਚ ਦੱਸਿਆ ਗਿਆ ਕਿ ਜਦੋਂ ਜਹਾਜ਼ ਰਨਵੇਅ ਦੇ ਕੋਲ ਉਤਰਨ ਵਾਲਾ ਸੀ, ਉਦੋਂ ਹੀ ਉਸ ਦੇ ਲੈਂਡਿੰਗ ਟਾਇਰ ਅਤੇ ਹੇਠਲਾ ਹਿੱਸਾ ਇੱਕ ਖੰਭੇ ਅਤੇ ਟ੍ਰੈਕਟਰ-ਟ੍ਰੇਲਰ (ਵੱਡੇ ਟਰੱਕ) ਨਾਲ ਟਕਰਾ ਗਿਆ। ਪੁਲਿਸ ਨੇ ਕਿਹਾ ਕਿ ਇਸ ਤੋਂ ਬਾਅਦ ਉਹ ਖੰਭਾ ਇੱਕ ਜੀਪ ਨਾਲ ਵੀ ਟਕਰਾ ਗਿਆ, ਜੋ ਉਸੇ ਹਾਈਵੇਅ ‘ਤੇ ਚੱਲ ਰਹੀ ਸੀ।
ਪੋਰਟ ਅਥਾਰਟੀ ਆਫ ਨਿਊਯਾਰਕ ਐਂਡ ਨਿਊ ਜਰਸੀ ਦੇ ਅਨੁਸਾਰ, ਜਹਾਜ਼ ਵਿੱਚ ਸਵਾਰ ਕਿਸੇ ਵੀ ਵਿਅਕਤੀ ਨੂੰ ਸੱਟ ਨਹੀਂ ਲੱਗੀ। ਟਰੱਕ ਡਰਾਈਵਰ ਨੂੰ ਮਾਮੂਲੀ ਸੱਟਾਂ ਆਈਆਂ ਹਨ, ਜਿਸ ਨੂੰ ਹਸਪਤਾਲ ਲਿਜਾਇਆ ਗਿਆ ਅਤੇ ਬਾਅਦ ਵਿੱਚ ਛੁੱਟੀ ਦੇ ਦਿੱਤੀ ਗਈ। ਯੂਨਾਈਟਿਡ ਏਅਰਲਾਈਨਜ਼ ਨੇ ਬਿਆਨ ਵਿੱਚ ਕਿਹਾ ਕਿ ਉਹ ਇਸ ਘਟਨਾ ਦੀ ਡੂੰਘਾਈ ਨਾਲ ਫਲਾਈਟ ਸੇਫਟੀ ਜਾਂਚ ਕਰੇਗੀ।
