UPI ਭੁਗਤਾਨ ਦੇ ਬਦਲ ਜਾਣਗੇ ਨਿਯਮ ਬਦਲ! 10,000 ਤੋਂ ਵੱਧ ਦੀ ਪੇਮੈਂਟ ਲਈ ਕਰਨਾ ਪਵੇਗਾ ਇੱਕ ਘੰਟਾ ਇੰਤਜ਼ਾਰ
ਨਵੀ ਦਿੱਲੀ, 10 ਅਪ੍ਰੈਲ (ਵਿਸ਼ਵ ਵਾਰਤਾ) – ਜੇਕਰ ਤੁਸੀਂ UPI ਜਾਂ IMPS ਰਾਹੀਂ ਕਿਸੇ ਵਿਅਕਤੀ ਨੂੰ 10,000 ਰੁਪਏ ਤੋਂ ਵੱਧ ਦੀ ਰਕਮ ਭੇਜਦੇ ਹੋ, ਤਾਂ ਉਸ ਰਕਮ ਨੂੰ ਪਹੁੰਚਣ ਵਿੱਚ ਇੱਕ ਘੰਟੇ ਤੱਕ ਇੰਤਜ਼ਾਰ ਕਰਨਾ ਪੈ ਸਕਦਾ ਹੈ। ਦਰਅਸਲ, ਦੇਸ਼ ਵਿੱਚ ਵਧ ਰਹੇ ਡਿਜੀਟਲ ਫਰਾਡ ਨੂੰ ਰੋਕਣ ਲਈ ਭਾਰਤੀ ਰਿਜ਼ਰਵ ਬੈਂਕ ਇੱਕ ਵੱਡਾ ਕਦਮ ਚੁੱਕਣ ‘ਤੇ ਵਿਚਾਰ ਕਰ ਰਿਹਾ ਹੈ।
ਨਵੀਂ ਯੋਜਨਾ ਤਹਿਤ 10,000 ਰੁਪਏ ਤੋਂ ਵੱਧ ਦੇ ਡਿਜੀਟਲ ਲੈਣ-ਦੇਣ ‘ਤੇ 1 ਘੰਟੇ ਤੱਕ ਦਾ ਵੇਟਿੰਗ ਪੀਰੀਅਡ ਲਾਗੂ ਕੀਤਾ ਜਾ ਸਕਦਾ ਹੈ। RBI ਨੇ 8 ਮਈ 2026 ਤੱਕ ਇਸ ਪ੍ਰਸਤਾਵ ‘ਤੇ ਸੁਝਾਅ ਮੰਗੇ ਹਨ। ਇਸ ਤੋਂ ਬਾਅਦ ਅੰਤਿਮ ਦਿਸ਼ਾ-ਨਿਰਦੇਸ਼ ਜਾਰੀ ਕੀਤੇ ਜਾ ਸਕਦੇ ਹਨ।
ਇਸ ਅਨੁਸਾਰ ਹੋ ਸਕਦਾ ਹੈ ਕਿ ਤੁਹਾਡਾ 10 ਹਜ਼ਾਰ ਰੁਪਏ ਤੋਂ ਵੱਧ ਦਾ ਆਨਲਾਈਨ ਲੈਣ-ਦੇਣ ਸ਼ਾਇਦ ਹੁਣ ਤੁਰੰਤ ਨਾ ਹੋਵੇ। ਇਸ ਵਿੱਚ 1 ਘੰਟੇ ਦੀ ਦੇਰੀ ਹੋ ਸਕਦੀ ਹੈ। ਇਸ ਨਾਲ ਗਾਹਕਾਂ ਨੂੰ ਗਲਤ ਲੈਣ-ਦੇਣ ਰੋਕਣ ਜਾਂ ਕੈਂਸਲ ਕਰਨ ਦਾ ਮੌਕਾ ਮਿਲੇਗਾ। ਦੇਸ਼ ਵਿੱਚ ਵਧ ਰਹੇ ਡਿਜੀਟਲ ਫਰਾਡ ਨੂੰ ਰੋਕਣ ਲਈ RBI ਨੇ ਇਹ ਪ੍ਰਸਤਾਵ ਰੱਖਿਆ ਹੈ।
RBI ਦਾ ਮੰਨਣਾ ਹੈ ਕਿ ਧੋਖੇਬਾਜ਼ ਅਕਸਰ ਮਨੋਵਿਗਿਆਨਕ ਦਬਾਅ ਬਣਾ ਕੇ ਜਲਦਬਾਜ਼ੀ ਵਿੱਚ ਪੈਸੇ ਟ੍ਰਾਂਸਫਰ ਕਰਵਾਉਂਦੇ ਹਨ, ਇਹ ਦੇਰੀ ਉਸ ਦਬਾਅ ਨੂੰ ਖ਼ਤਮ ਕਰੇਗੀ। ਫਿਲਹਾਲ ਜ਼ਿਆਦਾਤਰ ਡਿਜੀਟਲ ਲੈਣ-ਦੇਣ ਤੁਰੰਤ ਹੁੰਦੇ ਹਨ, ਜਿਸ ਕਾਰਨ ਯੂਜ਼ਰ ਨੂੰ ਸੋਚਣ ਜਾਂ ਗਲਤੀ ਸੁਧਾਰਨ ਦਾ ਮੌਕਾ ਨਹੀਂ ਮਿਲਦਾ।
ਇਸ ਤੋਂ ਇਲਾਵਾ 70 ਸਾਲ ਤੋਂ ਵੱਧ ਉਮਰ ਦੇ ਬਜ਼ੁਰਗਾਂ ਅਤੇ ਦਿਵਿਆਂਗਾਂ ਲਈ ਸੁਰੱਖਿਆ ਹੋਰ ਸਖ਼ਤ ਹੋਵੇਗੀ। 50,000 ਰੁਪਏ ਤੋਂ ਵੱਧ ਦੇ ਲੈਣ-ਦੇਣਲਈ ਇੱਕ ‘ਟ੍ਰਸਟਿਡ ਪਰਸਨ’ (ਭਰੋਸੇਮੰਦ ਵਿਅਕਤੀ) ਦੀ ਮਨਜ਼ੂਰੀ ਜ਼ਰੂਰੀ ਹੋ ਸਕਦੀ ਹੈ। ਇਹ ਫਰਾਡ ਦੇ ਖ਼ਿਲਾਫ਼ ਸੁਰੱਖਿਆ ਦੀ ਇੱਕ ਦੂਜੀ ਪਰਤ ਵਜੋਂ ਕੰਮ ਕਰੇਗਾ।
ਇਸ ਦੇ ਨਾਲ ਹੀ ਜੇਕਰ ਤੁਸੀਂ ਕਿਸੇ ਅਜਿਹੇ ਵਿਅਕਤੀ ਜਾਂ ਮਰਚੈਂਟ ਨੂੰ ਪੈਸੇ ਭੇਜ ਰਹੇ ਹੋ ਜਿਸ ਨੂੰ ਤੁਸੀਂ ਜਾਣਦੇ ਹੋ, ਤਾਂ ਤੁਸੀਂ ਉਸ ਨੂੰ ਆਪਣੀ ‘ਵਾਈਟਲਿਸਟ’ ਵਿੱਚ ਸ਼ਾਮਲ ਕਰ ਸਕਦੇ ਹੋ। ਵਾਈਟਲਿਸਟ ਕੀਤੇ ਗਏ ਲੋਕਾਂ ਨੂੰ ਪੇਮੈਂਟ ਕਰਨ ਵੇਲੇ ਇਹ 1 ਘੰਟੇ ਦੀ ਦੇਰੀ ਲਾਗੂ ਨਹੀਂ ਹੋਵੇਗੀ, ਜਿਸ ਨਾਲ ਰੋਜ਼ਾਨਾ ਦੇ ਲੈਣ-ਦੇਣ ਵਿੱਚ ਕੋਈ ਮੁਸ਼ਕਲ ਨਹੀਂ ਆਵੇਗੀ।
ਹੋਰ ਖਬਰਾਂ ਪੜ੍ਹਨ ਲਈ ਦਿੱਤੇ ਗਏ ਲਿੰਕ ਤੇ ਕਲਿੱਕ ਕਰੋ : https://wishavwarta.in/
