Flights ਵਿੱਚ 60% ਸੀਟਾਂ ‘ਤੇ ਵਾਧੂ ਚਾਰਜ ਖਤਮ
– ਹੁਣ ਬਿਨਾਂ ਵਾਧੂ ਖਰਚੇ ਦੇ ਨਾਲ-ਨਾਲ ਬੈਠ ਕੇ ਕਰ ਸਕੋਗੇ ਹਵਾਈ ਸਫ਼ਰ!
ਨਵੀ ਦਿੱਲੀ, 18 ਮਾਰਚ 2026 (ਵਿਸ਼ਵ ਵਾਰਤਾ) – ਸਿਵਲ ਐਵੀਏਸ਼ਨ ਮਿਨਿਸਟਰੀ (ਸ਼ਹਿਰੀ ਹਵਾਬਾਜ਼ੀ ਮੰਤਰਾਲੇ) ਨੇ ਘਰੇਲੂ ਹਵਾਈ ਯਾਤਰਾ ਨੂੰ ਵਧੇਰੇ ਸੁਵਿਧਾਜਨਕ ਬਣਾਉਣ ਲਈ ਨਵੇਂ ਨਿਯਮ ਜਾਰੀ ਕੀਤੇ ਹਨ। ਨਵੇਂ ਹੁਕਮਾਂ ਅਨੁਸਾਰ, ਏਅਰਲਾਈਨਜ਼ ਨੂੰ ਹਰ ਫਲਾਈਟ ਵਿੱਚ ਘੱਟੋ-ਘੱਟ 60% ਸੀਟਾਂ ਬਿਨਾਂ ਕਿਸੇ ਵਾਧੂ ਚਾਰਜ ਦੇ ਦੇਣੀਆਂ ਹੋਣਗੀਆਂ। ਇਹ ਨਿਰਦੇਸ਼ ਘਰੇਲੂ ਉਡਾਣਾਂ ‘ਤੇ ਲਾਗੂ ਹੋਣਗੇ।
ਸਰਕਾਰ ਦਾ ਕਹਿਣਾ ਹੈ ਕਿ ਦੇਸ਼ ਵਿੱਚ ਰੋਜ਼ਾਨਾ 5 ਲੱਖ ਤੋਂ ਵੱਧ ਲੋਕ ਹਵਾਈ ਸਫ਼ਰ ਕਰ ਰਹੇ ਹਨ, ਅਜਿਹੇ ਵਿੱਚ ਯਾਤਰੀਆਂ ਨੂੰ ਬਿਹਤਰ ਸਹੂਲਤਾਂ ਦੇਣਾ ਜ਼ਰੂਰੀ ਹੋ ਗਿਆ ਹੈ। ਹੁਣ ਤੱਕ ਏਅਰਲਾਈਨਜ਼ ਜ਼ਿਆਦਾਤਰ ਸੀਟਾਂ ਲਈ ਵਾਧੂ ਫੀਸ ਲੈਂਦੀਆਂ ਸਨ। ਪਰ ਨਵੇਂ ਨਿਯਮਾਂ ਤਹਿਤ ਹੁਣ ਹਰ ਫਲਾਈਟ ਵਿੱਚ ਘੱਟੋ-ਘੱਟ 60% ਸੀਟਾਂ ਫਰੀ ਰੱਖਣੀਆਂ ਹੋਣਗੀਆਂ। ਇਸ ਦਾ ਮਤਲਬ ਹੈ ਕਿ ਯਾਤਰੀਆਂ ਨੂੰ ਸੀਟ ਚੁਣਨ ਲਈ ਵੱਖਰੇ ਪੈਸੇ ਨਹੀਂ ਦੇਣੇ ਪੈਣਗੇ, ਜਿਸ ਨਾਲ ਯਾਤਰਾ ਦਾ ਕੁੱਲ ਖਰਚਾ ਘੱਟ ਹੋ ਸਕਦਾ ਹੈ।
ਅਕਸਰ ਦੇਖਿਆ ਜਾਂਦਾ ਹੈ ਕਿ ਇੱਕੋ ਟਿਕਟ ਜਾਂ PNR ‘ਤੇ ਬੁਕਿੰਗ ਕਰਨ ਦੇ ਬਾਵਜੂਦ ਪਰਿਵਾਰ ਦੇ ਮੈਂਬਰਾਂ ਨੂੰ ਵੱਖ-ਵੱਖ ਸੀਟਾਂ ਦਿੱਤੀਆਂ ਜਾਂਦੀਆਂ ਸਨ ਅਤੇ ਇਕੱਠੇ ਬੈਠਣ ਲਈ ਵਾਧੂ ਫੀਸ ਦੇਣੀ ਪੈਂਦੀ ਸੀ। ਹੁਣ ਨਵੇਂ ਨਿਯਮ ਦੇ ਤਹਿਤ ਏਅਰਲਾਈਨਜ਼ ਨੂੰ ਇਹ ਯਕੀਨੀ ਬਣਾਉਣਾ ਹੋਵੇਗਾ ਕਿ ਇੱਕੋ ਬੁਕਿੰਗ ਵਾਲੇ ਯਾਤਰੀਆਂ ਨੂੰ ਨਾਲ-ਨਾਲ ਜਾਂ ਆਸ-ਪਾਸ ਸੀਟ ਮਿਲੇ। ਇਸ ਨਾਲ ਪਰਿਵਾਰ ਅਤੇ ਗਰੁੱਪ ਵਿੱਚ ਸਫਰ ਕਰਨ ਵਾਲਿਆਂ ਨੂੰ ਵੱਡੀ ਰਾਹਤ ਮਿਲੇਗੀ।
ਸਰਕਾਰ ਨੇ ਏਅਰਲਾਈਨਜ਼ ਨੂੰ ਸਪੱਸ਼ਟ ਨਿਰਦੇਸ਼ ਦਿੱਤੇ ਹਨ ਕਿ ਉਹ ਆਪਣੇ ਚਾਰਜਾਂ ਨੂੰ ਪਾਰਦਰਸ਼ੀ ਬਣਾਉਣ। ਖੇਡਾਂ ਦਾ ਸਮਾਨ, ਸੰਗੀਤਕ ਸਾਜ਼ ਜਾਂ ਪਾਲਤੂ ਜਾਨਵਰ ਲੈ ਕੇ ਜਾਣ ਦੇ ਨਿਯਮ ਵੀ ਸਪੱਸ਼ਟ ਕਰਨੇ ਹੋਣਗੇ। ਇਸ ਤੋਂ ਇਲਾਵਾ ਫਲਾਈਟ ਵਿੱਚ ਦੇਰੀ, ਕੈਂਸਲੇਸ਼ਨ ਜਾਂ ਬੋਰਡਿੰਗ ਤੋਂ ਮਨਾਂ ਕਰਨ ਵਰਗੀਆਂ ਸਥਿਤੀਆਂ ਵਿੱਚ ਯਾਤਰੀਆਂ ਦੇ ਅਧਿਕਾਰਾਂ ਦੀ ਸਖ਼ਤੀ ਨਾਲ ਪਾਲਣਾ ਕਰਨੀ ਹੋਵੇਗੀ।
ਹੋਰ ਖਬਰਾਂ ਪੜ੍ਹਨ ਲਈ ਦਿੱਤੇ ਗਏ ਲਿੰਕ ਤੇ ਕਲਿੱਕ ਕਰੋ : https://wishavwarta.in/
