IPL 2025: ਚਿੱਟੀਆਂ ਜਰਸੀਆਂ ਨਾਲ ਭਰਿਆ ਚਿੰਨਾਸਵਾਮੀ ਸਟੇਡੀਅਮ
– ਮੀਂਹ ਕਾਰਨ ਮੈਚ ‘ਚ ਦੇਰੀ, ਓਵਰਾਂ ‘ਚ ਹੋਵੇਗੀ ਕਟੌਤੀ!
ਨਵੀ ਦਿੱਲੀ, 17 ਮਈ (ਵਿਸ਼ਵ ਵਾਰਤਾ): ਇੰਡੀਅਨ ਪ੍ਰੀਮੀਅਰ ਲੀਗ 2025 (IPL 2025) ਦਾ 58ਵਾਂ ਮੈਚ ਅੱਜ ਰਾਇਲ ਚੈਲੇਂਜਰਜ਼ ਬੰਗਲੌਰ (RCB) ਅਤੇ ਕੋਲਕਾਤਾ ਨਾਈਟ ਰਾਈਡਰਜ਼ (KKR) ਵਿਚਕਾਰ ਖੇਡਿਆ ਜਾਵੇਗਾ। ਇਹ ਮੈਚ ਬੰਗਲੁਰੂ ਦੇ ਘਰੇਲੂ ਮੈਦਾਨ ਐਮ ਚਿੰਨਾਸਵਾਮੀ ਸਟੇਡੀਅਮ ਵਿੱਚ ਸ਼ਾਮ 7:30 ਵਜੇ ਸ਼ੁਰੂ ਹੋਣਾ ਸੀ। ਪਰ ਮੀਂਹ ਕਾਰਨ ਮੈਚ ‘ਚ ਦੇਰੀ ਹੋ ਰਹੀ ਹੈ। ਐਮ ਚਿੰਨਾਸਵਾਮੀ ਸਟੇਡੀਅਮ ਵਿੱਚ ਫਿਰ ਤੋਂ ਮੀਂਹ ਸ਼ੁਰੂ ਹੋ ਗਿਆ ਹੈ। ਰਾਤ 8:30 ਵਜੇ ਤੋਂ ਬਾਅਦ ਓਵਰਾਂ ਵਿੱਚ ਕਟੌਤੀ ਸ਼ੁਰੂ ਹੋ ਗਈ ਹੈ।
ਦੱਸ ਦਈਏ ਕਿ ਅੱਜ ਆਰਸੀਬੀ ਦੇ ਪ੍ਰਸ਼ੰਸਕ ਆਪਣੀ ਟੀਮ ਦੀ ਲਾਲ ਅਤੇ ਕਾਲੀ ਜਰਸੀ ਵਿੱਚ ਨਹੀਂ, ਸਗੋਂ ਚਿੱਟੀ ਜਰਸੀ ਵਿੱਚ ਆਏ। ਇਹ ਵਿਰਾਟ ਕੋਹਲੀ ਦੇ ਟੈਸਟ ਕ੍ਰਿਕਟ ਤੋਂ ਸੰਨਿਆਸ ਲੈਣ ‘ਤੇ ਪ੍ਰਸ਼ੰਸਕਾਂ ਵੱਲੋਂ ਉਨ੍ਹਾਂ ਨੂੰ ਇੱਕ ਵਿਸ਼ੇਸ਼ ਟ੍ਰਬਿਊਟ ਹੈ। ਵਿਰਾਟ ਕੋਹਲੀ ਨੇ 12 ਮਈ ਨੂੰ ਟੈਸਟ ਕ੍ਰਿਕਟ ਤੋਂ ਸੰਨਿਆਸ ਲੈ ਲਿਆ ਸੀ। ਅੱਜ ਪ੍ਰਸ਼ੰਸਕ ਕੋਹਲੀ ਨੂੰ ਵਿਸ਼ੇਸ਼ ਟ੍ਰਬਿਊ ਦੇਣ ਲਈ ਚਿੱਟੀ ਜਰਸੀ ਨੰਬਰ 18 ਵਿੱਚ ਪਹੁੰਚੇ ਹਨ। ਉਨ੍ਹਾਂ ਵਿੱਚੋਂ ਇੱਕ ਨੇ ਆਪਣੇ ਸਰੀਰ ‘ਤੇ ਵਿਰਾਟ ਕੋਹਲੀ ਦਾ ਟੈਟੂ ਵੀ ਬਣਵਾਇਆ ਹੋਇਆ ਹੈ।
ਵਿਰਾਟ ਕੋਹਲੀ ਨੇ ਹਾਲ ਹੀ ਵਿੱਚ ਟੈਸਟ ਕ੍ਰਿਕਟ ਤੋਂ ਸੰਨਿਆਸ ਲਿਆ। ਬੈਂਗਲੁਰੂ ਦੇ ਪ੍ਰਸ਼ੰਸਕਾਂ ਨੇ ਉਸਦੇ ਸ਼ਾਨਦਾਰ ਕਰੀਅਰ ਦੇ ਸਨਮਾਨ ਚ ਇੱਕ ਮੁਹਿੰਮ ਸ਼ੁਰੂ ਕੀਤੀ। ਉਹ ਚਾਹੁੰਦੇ ਹਨ ਕਿ ਮੈਚ ਦੇਖਣ ਆਉਣ ਵਾਲਾ ਹਰ ਕੋਈ ਚਿੱਟੇ ਕੱਪੜੇ ਪਾ ਕੇ ਆਵੇ। ਚਿੱਟਾ ਰੰਗ ਟੈਸਟ ਕ੍ਰਿਕਟ ਦਾ ਪ੍ਰਤੀਕ ਹੈ। ਇਹ ਕੋਹਲੀ ਲਈ ਵਿਦਾਇਗੀ ਸੁਨੇਹਾ ਹੋਵੇਗਾ।
