ਸ਼ਿਕਾਗੋ ‘ਚ ਹੋਣ ਵਾਲੀ ‘ਵਿਸ਼ਵ ਹਿੰਦੂ ਕਾਨਫ਼ਰੰਸ’ ਦਾ ਕਰਾਂਗੇ ਸਖ਼ਤ ਵਿਰੋਧ : ਸਿੱਖ ਕੋਆਰਡੀਨੇਸ਼ਨ ਕਮੇਟੀ

ਆਰਐਸਐਸ ਮੁਖੀ ਮੋਹਨ ਭਾਗਵਤ ਤੇ ਯੋਗੀ ਅਦਿੱਤਿਆ ਨੰਦ ਦਾ ਕੀਤਾ ਜਾਵੇਗਾ ਘਿਰਾਓ : ਹਿੰਮਤ ਸਿੰਘ
ਸਿੱਖਾਂ ਅਤੇ ਦਲਿਤਾਂ ਤੇ ਜੁਲਮ ਕਰਨ ਵਾਲਿਆਂ ਦੀ ਅਵਾਜ਼ ਕਰਾਂਗੇ ਸਿਕਾਗੋ ਵਿਚ ਬੰਦ : ਆਗੂ
ਨਿਊਯਾਰਕ 2 ਮਈ (ਵਿਸ਼ਵ ਵਾਰਤਾ) : ਸਵਾਮੀ ਵਿਵੇਕਾ ਨੰਦ ਦਾ ਸਹਾਰਾ ਲੈ ਕੇ ਹਿੰਦੂਤਵਾ ਦੇ ਭਗਵਾਂ ਕਰਨ ਦੇ ਏਜੰਡੇ ਉੱਤੇ ਦੇਸ਼ਾਂ ਵਿਦੇਸ਼ਾਂ ਵਿਚ ਪ੍ਰਚਾਰ ਕਰ ਰਹੀ ਰਾਸ਼ਟਰੀ ਸਵੈਮ ਸੇਵਕ ਸੰਘ (ਆਰਐਸਐਸ) ਅਤੇ ਭਾਰਤੀ ਜਨਤਾ ਪਾਰਟੀ ਦੇ ਵਿਰੋਧ ਵਿਚ ਅਮਰੀਕਾ ਦੀਆਂ ਗੁਰਦੁਆਰਾ ਕਮੇਟੀਆਂ ਅਤੇ ਪੰਥਕ ਜਥੇਬੰਦੀਆਂ ਵੱਲੋਂ ਸਾਂਝੇ ਤੌਰ ਤੇ ਬਣਾਈ ਸਿੱਖ ਕੋਆਰਡੀਨੇਸ਼ਨ ਕਮੇਟੀ ਈਸਟ ਕੋਸਟ ਨੇ ਸਖ਼ਤ ਵਿਰੋਧ ਕੀਤਾ ਹੈ, ਅਤੇ ਕਿਹਾ ਹੈ ਕਿ ਸ਼ਿਕਾਗੋ ਵਿਚ 7 ਤੋਂ 9 ਸਤੰਬਰ 2018 ਨੂੰ ਕੱਟੜਪੰਥੀ ਹਿੰਦੂ ਜਥੇਬੰਦੀਆਂ ਆਰਐਸਐਸ ਅਤੇ ਭਾਜਪਾ ਵੱਲੋਂ ਕੀਤੀ ਜਾ ਰਹੀ ‘ਵਿਸ਼ਵ ਹਿੰਦੂ ਕਾਨਫ਼ਰੰਸ’ ਦਾ ਉਹ ਸਖ਼ਤ ਵਿਰੋਧ ਕਰਨਗੇ ਅਤੇ ਇਸ ਕਾਨਫ਼ਰੰਸ ਵਿਰੁੱਧ ਤਿੰਨੇ ਦਿਨ ਮੁਜ਼ਾਹਰੇ ਕੀਤੇ ਜਾਣਗੇ ਅਤੇ ਇਨ੍ਹਾਂ ਦਾ ਘਿਰਾਓ ਕੀਤਾ ਜਾਵੇਗਾ।
ਇਹ ਬਿਆਨ ਜਾਰੀ ਕਰਦਿਆਂ ਸਿੱਖ ਕੋਆਰਡੀਨੇਸ਼ਨ ਕਮੇਟੀ ਈਸਟ ਕੋਸਟ (ਯੂਐਸਏ) ਦੇ ਕੋਆਰਡੀਨੇਟਰ ਹਿੰਮਤ ਸਿੰਘ, ਕੇਵਲ ਸਿੰਘ ਸਿੱਧੂ, ਹਰਜਿੰਦਰ ਸਿੰਘ, ਵੀਰ ਸਿੰਘ ਮਾਂਗਟ, ਦਵਿੰਦਰ ਸਿੰਘ ਦਿਓ ਨੇ ਕਿਹਾ ਕਿ ਸਤੰਬਰ 1893 ਵਿਚ 125 ਸਾਲ ਪਹਿਲਾਂ ‘ਵਰਲਡ ਰਲੀਜੀਅਸ ਪਾਰਲੀਮੈਂਟ’ ਸ਼ਿਕਾਗੋ ਵਿਚ ਹੋਈ ਸੀ, ਉਸ ਵਿਚ ਸਵਾਮੀ ਵਿਵੇਕਾ ਨੰਦ ਜਿਹੇ ਵਿਅਕਤੀ ਪੁੱਜੇ ਸਨ। ਪਰ ਹੁਣ ਸਵਾਮੀ ਵਿਵੇਕਾ ਨੰਦ ਦਾ ਨਾਮ ਵਰਤ ਕੇ ਆਰਐਸਐਸ ਨੇ ਹਿੰਦੂਤਵਾ ਦੇ ਭਗਵੇਂ ਕਰਨ ਦੇ ਏਜੰਡੇ ਨੂੰ ਵਿਦੇਸ਼ਾਂ ਵਿਚ ਫਿਲਾਉਣ ਦਾ ਕੰਮ ਅਰੰਭ ਦਿੱਤਾ ਹੈ, ਇਸ ਕਾਨਫ਼ਰੰਸ ਵਿਚ ਜਿੱਥੇ ਆਰਐਸਐਸ ਦੇ ਮੁਖੀ ਮੋਹਨ ਭਾਗਵਤ ਪੁੱਜ ਰਹੇ ਹਨ ਉੱਥੇ ਹੀ ਯੂ ਪੀ ਦੇ ਮੁੱਖ ਮੰਤਰੀ ਯੋਗੀ ਆਦਿਤਿਆ ਨੰਦ ਤੇ ਮਹਾਰਾਸਟਰ ਦੇ ਮੁੱਖ ਮੰਤਰੀ ਦਵਿੰਦਰ ਫੰਡਨਵੀਸ ਵੀ ਪੁੱਜ ਰਹੇ ਹਨ, ਹਿੰਮਤ ਸਿੰਘ ਨੇ ਕਿਹਾ ਕਿ ਜਦੋਂ ਦੀ ਭਾਰਤ ਵਿਚ ਬੀਜੇਪੀ ਦੀ ਸਰਕਾਰ ਆਈ ਹੈ ਉਦੋਂ ਤੋਂ ਹੀ ਭਾਰਤ ਦੇ ਸਾਰੇ ਰਾਜਾਂ ਵਿਚ ਬਲਾਤਕਾਰਾਂ ਦੀਆਂ ਘਟਨਾਵਾਂ ਹੋ ਰਹੀਆਂ ਹਨ, ਤਾਜੀ ਮਿਸਾਲ ਆਸਿਫਾ ਦੀ ਹੈ, ਭਾਰਤ ਵਿਚ ਦਲਿਤਾਂ ਖਿਲਾਫ, ਘੱਟ ਗਿਣਤੀਆਂ ਖਿਲਾਫ ਜੁਲਮ ਹੋ ਰਹੇ ਹਨ, ਈਸਾਈਆਂ ਦੀਆਂ ਚਰਚਾਂ, ਮੁਸਲਮਾਨਾਂ ਦੀਆਂ ਮਸਜਿਦਾਂ ਤੇ ਸਿੱਖਾਂ ਦੇ ਗੁਰਦੁਆਰਿਆਂ ਨੂੰ ਵੀ ਤੋੜਿਆ ਜਾ ਰਿਹਾ ਹੈ ਤੇ ਇਤਿਹਾਸਕ ਗੁਰੂ ਘਰਾਂ ਤੇ ਕਬਜ਼ੇ ਕੀਤੇ ਜਾ ਰਹੇ ਹਨ, ਚੇਤੇ ਰਹੇ ਅਸੀਂ ਸਾਰੇ ਧਰਮਾਂ ਦਾ ਸਤਿਕਾਰ ਕਰਦੇ ਹਾਂ ਪਰ ਜਦੋਂ ਹਿੰਦੁਤਵਾ ਅਤੇ ਆਰਐਸਐਸ ਦਾ ਘੱਟ ਗਿਣਤੀਆਂ ਪ੍ਰਤੀ ਰਵੱਈਆ ਬੜਾ ਘਾਤਕ ਹੈ, ਜਿਸ ਵਿਚ ਸਿੱਖ ਗੁਰੂ ਸਹਿਬਾਨਾਂ ਦੇ ਇਤਿਹਾਸ ਨਾਲ ਛੇੜ-ਛਾੜ ਕਰਨੀ ਤੇ ਅਪਮਾਨਜਨਕ ਟਿਪਣੀਆਂ ਕਰਨੀਆ ਤੇ ਸਿੱਖਾਂ ਨੂੰ ਹਿੰਦੂ ਧਰਮ ਦਾ ਹੀ ਹਿਸਾ ਦਸਣਾ ਜੋ ਬਰਦਾਸਤ ਤੋਂ ਬਾਹਰ ਹੈ। ਯੋਗੀ ਅਦਿਤਿਆ ਨੰਦ ਦਾ ਭਗਵਾਂ ਕਰਨ ਯੂ ਪੀ ਵਿਚ ਸਪਸ਼ਟ ਨਜ਼ਰ ਆਉਂਦਾ ਹੈ। ਹਿੰਮਤ ਸਿੰਘ ਨੇ ਕਿਹਾ ਹੈ ਕਿ ਉਹ ਸ਼ਿਕਾਗੋ ਵਿਚ ਹੋ ਰਹੀ ਵਿਸ਼ਵ ਹਿੰਦੂ ਕਾਨਫ਼ਰੰਸ ਦਾ ਜਬਰਦਸਤ ਵਿਰੋਧ ਕਰਨਗੇ ਤੇ ਤਿੰਨੇ ਦਿਨ ਮੁਜ਼ਾਹਰੇ ਕੀਤੇ ਜਾਣਗੇ। ਉਨ੍ਹਾਂ ਕਿਹਾ ਕਿ ਹਿੰਦੁਤਵਾ ਜੋ ਕਿ ਭਾਰਤ ਵਿਚ ਘੱਟ ਗਿਣਤੀਆਂ ਤੇ ਦਲਿਤਾਂ ਲਈ ਕੱਟੜਤਾ ਨਾਲ ਭਰਿਆ ਅਤਵਾਦ ਹੈ ਦੇ ਵਿਰੋਧ ਵਿਚ ਸਾਰੇ ਲੋਕ ਇਕਮੁੱਠ ਹੋਣ ਤਾਂ ਕਿ ਅਮਰੀਕਾ ਵਿਚ ਇਨ੍ਹਾਂ ਦੇ ਭਗਵੇਂ ਕਰਨ ਦੇ ਏਜੰਡੇ ਨੂੰ ਖਤਮ ਕੀਤਾ ਜਾ ਸਕੇ। ਉਨ੍ਹਾਂ ਕਿਹਾ ਕਿ ਇਸ ਕਾਨਫ਼ਰੰਸ ਨੂੰ ਜਿੱਥੇ ਤੱਕ ਹੋ ਸਕਿਆ ਅਮਰੀਕੀ ਸਰਕਾਰ ਨੂੰ ਹਿੰਦੂਤਵਾ ਦੇ ਅਸਲ ਏਜੰਡੇ ਤੋਂ ਜਾਣੂ ਕਰਵਾ ਕੇ ਰਾਬਤਾ ਕਾਇਮ ਕਰਕੇ ਰੱਦ ਕਰਾਉਣ ਲਈ ਉਹ ਹਰ ਹੀਲਾ ਵਰਤਣਗੇ, ਕਿਉਂਕਿ ਇਹ ਕਾਨਫਰੰਸ ਘੱਟ ਗਿਣਤੀਆਂ ਵਿਚ ਖੌਫ ਪੈਦਾ ਕਰਨ ਲਈ ਕੀਤੀ ਜਾ ਰਹੀ ਹੈ।