ਜਲੰਧਰ 28 ਅਕਤੂਬਰ ( ਵਿਸ਼ਵ ਵਾਰਤਾ) – ਪੱਛਮੀ ਰੇਲਵੇ ਮੁੰਬਈ ਅਤੇ ਰੇਲ ਕੋਚ ਫੈਕਟਰੀ ਕਪੂਰਥਲਾ ਦੀਆਂ ਟੀਮਾਂ 34ਵੇਂ ਇੰਡੀਅਨ ਆਇਲ ਸਰਵੋ ਸੁਰਜੀਤ ਹਾਕੀ ਟੂਰਨਾਮੈਂਟ ਦੇ ਮਹਿਲਾਵਾਂ ਦੇ ਵਰਗ ਦੇ ਫਾਇਨਲ ਵਿੱਚ ਭਿੜਨਗੀਆਂ। ਸਥਾਨਕ ਉਲੰਪੀਅਨ ਸੁਰਜੀਤ ਹਾਕੀ ਸਟੇਡੀਅਮ ਵਿਖੇ ਜਾਰੀ ਉਕਤ ਟੂਰਨਾਮੈਂਟ ਦੇ ਮਹਿਲਾ ਵਰਗ ਦੇ ਆਖਰੀ ਲੀਗ ਮੈਚ ਵਿੱਚ ਪੱਛਮੀ ਰੇਲਵੇ ਨੇ ਪੰਜਾਬ ਇਲੈਵਨ ਨੂੰ 6-1 ਨਾਲ ਮਾਤ ਦੇ ਕੇ ਤਿੰਨ ਮੈਚਾਂ ਤੋਂ 9 ਅੰਕ ਹਾਸਲ ਕਰਕੇ ਫਾਇਨਲ ਵਿੱਚ ਪ੍ਰਵੇਸ਼ ਕੀਤਾ।
ਮਰਦਾਂ ਦੇ ਵਰਗ ਵਿੱਚ ਓਐਨਜੀਸੀ ਦਿੱਲੀ ਨੇ ਰਾਸ਼ਟਰੀ ਚੈਂਪੀਅਨ ਭਾਰਤੀ ਰੇਲਵੇ ਨੂੰ 3-1 ਦੇ ਫਰਕ ਨਾਲ ਹਰਾ ਕੇ ਸੈਮੀਫਾਇਨਲ ਵਿਚ ਪ੍ਰਵੇਸ਼ ਕੀਤਾ।
ਮਹਿਲਾਵਾਂ ਦੇ ਵਰਗ ਦੇ ਆਖਰੀ ਲੀਗ ਮੈਚ ਵਿੱਚ ਪੱਛਮੀ ਰੇਲਵੇ ਨੇ ਆਪਣੀ ਖੇਡ ਦਾ ਲੋਹਾ ਮੰਨਵਾਇਆ। ਖੇਡ ਦੇ 8ਵੇਂ ਮਿੰਟ ਵਿੱਚ ਸਰਿਤਾ ਨੇ ਮੈਦਾਨੀ ਗੋਲ ਕਰਕੇ ਖਾਤਾ ਖੋਲਿਆ। ਖੇਡ ਦੇ 24ਵੇਂ ਮਿੰਟ ਵਿੱਚ ਪੰਜਾਬ ਦੀ ਰਾਜਵਿੰਦਰ ਕੌਰ ਨੇ ਮੈਦਾਨੀ ਗੋਲ ਕਰਕੇ ਬਰਾਬਰੀ ਕੀਤੀ£ 33ਵੇਂ ਮਿੰਟ ਅਤੇ ਖੇਡ ਦੇ ਦੂਜੇ ਅੱਧ ਦੇ 47ਵੇਂ ਮਿੰਟ ਵਿੱਚ ਪੱਛਮੀ ਰੇਲਵੇ ਲਿਲੀ ਮਿਆਂਗਬਮ ਨੇ ਦੋ ਗੋਲ ਕਰਕੇ ਸਕੋਰ 3-1 ਕੀਤਾ। ਖੇਡ ਦੇ 52ਵੇਂ ਅਤੇ 58ਵੇਂ ਮਿੰਟ ਵਿੱਚ ਪੱਛਮੀ ਰੇਲਵੇ ਦੀ ਅਨੁਪਾ ਬਾਰਲਾ ਨੇ ਦੋ ਗੋਲ ਕਰਕੇ ਸਕੋਰ 5-1 ਕੀਤਾ। 66ਵੇਂ ਮਿੰਟ ਵਿੱਚ ਪੱਛਮੀ ਰੇਲਵੇ ਦੀ ਲਿਲੀ ਮਿਆਂਗਬਮ ਨੇ ਮੈਦਾਨੀ ਗੋਲ ਕਰਕੇ ਸਕੋਰ 6-1 ਕਰਕੇ ਮੈਚ ਆਪਣੇ ਨਾਂਅ ਕੀਤਾ। ਇਸ ਤੋਂ ਪਹਿਲਾਂ ਲੀਗ ਮੈਚਾਂ ਵਿੱਚ ਪੱਛਮੀ ਰੇਲਵੇ ਨੇ ਸੀਆਰਪੀਐਫ ਅਤੇ ਯੂਕੋ ਬੈਂਕ ਨੂੰ ਵੀ ਮਾਤ ਦਿੱਤੀ ਸੀ।
ਮਰਦਾਂ ਦੇ ਵਰਗ ਵਿੱਚ ਪੂਲ ਏ ਵਿੱਚ ਓਐਨਜੀਸੀ ਦਿੱਲੀ ਨੇ ਭਾਰਤੀ ਰੇਲਵੇ ਦੇ ਖਿਲਾਫ ਬੇਹਤਰੀਨ ਖੇਡ ਦਾ ਪ੍ਰਦਰਸ਼ਨ ਕੀਤਾ। ਖੇਡ ਦੇ 16ਵੇਂ ਮਿੰਟ ਵਿੱਚ ਓਐਨਜੀਸੀ ਦੇ ਸੁਮਿਤ ਕੁਮਾਰ ਨੇ ਗੁਰਜੰਟ ਸਿੰਘ ਦੇ ਪਾਸ ਤੇ ਮੈਦਾਨੀ ਗੋਲ ਕਰਕੇ ਸਕੋਰ 1-0 ਕੀਤਾ। 26ਵੇਂ ਮਿੰਟ ਵਿੱਚ ਓਐਨਜੀਸੀ ਦੇ ਮਨਦੀਪ ਸਿੰਘ ਨੇ ਮੈਦਾਨੀ ਗੋਲ ਕਰਕੇ ਸਕੋਰ 2-0 ਕੀਤਾ। ਅੱਧੇ ਸਮੇਂ ਤੱਕ ਓਐਨਜੀਸੀ 2-0 ਨਾਲ ਅੱਗੇ ਸੀ। ਅੱਧੇ ਸਮੇਂ ਤੋਂ ਬਾਅਦ 51ਵੇਂ ਮਿੰਟ ਵਿੱਚ ਰੇਲਵੇ ਦੇ ਅਮਿਤ ਰੋਹੀਦਾਸ ਨੇ ਪੈਨਲਟੀ ਕਾਰਨਰ ਰਾਹੀਂ ਗੋਲ ਕਰਕੇ ਸਕੋਰ 1-2 ਕੀਤਾ। ਦੋ ਮਿੰਟ ਬਾਅਦ ਓਐਨਜੀਸੀ ਦੇ ਸੁਮਨ ਖਜੂਰ ਨੇ ਮੈਦਾਨੀ ਗੋਲ ਕਰਕੇ ਸਕੋਰ 3-1 ਕੀਤਾ।
ਅੱਜ ਦੇ ਮੈਚਾਂ ਦੇ ਮੁੱਖ ਮਹਿਮਾਨ ਯਸ਼ਪਾਲ ਵਰਮਾ (ਇੰਡੀਅਨ ਆਇਲ) ਨੇਹਾ ਥਾਪਾ (ਇੰਡੀਅਨ ਆਇਲ) ਨੇ ਟੀਮਾਂ ਨਾਲ ਜਾਣ ਪਛਾਣ ਕੀਤੀ। ਇਸ ਮੌਕੇ ਤੇ ਗੁਰਵਿੰਦਰ ਕੌਰ ਸੰਧੂ (ਗਾਲਿਬ ਇੰਡੇਨ ਗੈਸ ਸਰਵਿਸ) ਉਲੰਪੀਅਨ ਵਰਿੰਦਰ ਸਿੰਘ, ਦਲਜੀਤ ਸਿੰਘ ਖਜਾਨਚੀ ਹਾਕੀ ਪੰਜਾਬ, ਬਲਦੇਵ ਸਿੰਘ ਰੰਧਾਵਾ, ਰਾਮ ਪ੍ਰਤਾਪ, ਲਖਵਿੰਦਰ ਪਾਲ ਸਿੰਘ ਖਹਿਰਾ ਐਸ ਪੀ, ਪੀ ਕੇ ਸਿਨਹਾ (ਕਮਿਸ਼ਨਰ ਪੁਲਿਸ ਜਲੰਧਰ) ਰਣਬੀਰ ਸਿੰਘ ਟੁੱਟ ਵਿਸ਼ੇਸ਼ ਤੌਰ ਤੇ ਹਾਜ਼ਰ ਸਨ।
੨੯ ਅਕਤੂਬਰ ਦੇ ਮੈਚ
ਮਰਦ ਵਰਗ –
ਪੰਜਾਬ ਐਂਡ ਸਿੰਧ ਬੈਂਕ ਬਨਾਮ ਏਅਰ ਇੰਡੀਆ ਮੁੰਬਈ-4-15 ਵਜੇ
ਮਹਿਲਾ ਵਰਗ (ਫਾਇਨਲ) –
ਰੇਲ ਕੋਚ ਫੈਕਟਰੀ ਕਪੂਰਥਲਾ ਬਨਾਮ ਪੱਛਮੀ ਰੇਲਵੇ ਮੁੰਬਈ — ੬-੦੦ ਵਜੇ
