ਪੂਰਬੀ ਏਸ਼ੀਆ ‘ਚ ਤਣਾਅ ਵਧਿਆ, ਰੂਸ-ਉੱਤਰੀ ਕੋਰੀਆ ਸਮਝੌਤੇ ਤੋਂ ਬਾਅਦ ਅਮਰੀਕੀ ਜੰਗੀ ਜਹਾਜ਼ ਪਹੁੰਚਿਆ ਦੱਖਣੀ ਕੋਰੀਆ
ਨਵੀਂ ਦਿੱਲੀ 23 ਜੂਨ(ਵਿਸ਼ਵ ਵਾਰਤਾ): ਇੱਕ ਪਾਸੇ ਜਿੱਥੇ ਪੂਰਬੀ ਏਸ਼ੀਆ ਵਿੱਚ ਉੱਤਰੀ ਕੋਰੀਆ ਅਤੇ ਦੱਖਣੀ ਕੋਰੀਆ ਦੇ ਆਪਸੀ ਝਗੜੇ ਘੱਟ ਨਹੀਂ ਹੋ ਰਹੇ ਹਨ, ਉੱਥੇ ਹੀ ਦੂਜੇ ਪਾਸੇ ਦੁਨੀਆ ਦੀਆਂ ਦੋ ਵੱਡੀਆਂ ਸ਼ਕਤੀਆਂ ਦਰਮਿਆਨ ਹਾਲ ਹੀ ਵਿੱਚ ਪੈਦਾ ਹੋਏ ਹਲਾਤਾ ਨੇ ਸਾਰੇ ਦੇਸ਼ਾਂ ਦੇ ਮੱਥੇ ‘ਤੇ ਚਿੰਤਾ ਦੀਆਂ ਲਕੀਰਾਂ ਖਿੱਚ ਦਿੱਤੀਆਂ ਹਨ। ਰੂਸ ਦੇ ਰਾਸ਼ਟਰਪਤੀ ਵਲਾਦੀਮੀਰ ਪੁਤਿਨ ਨੇ ਇਸ ਹਫਤੇ 24 ਸਾਲਾਂ ਵਿੱਚ ਪਹਿਲੀ ਵਾਰ ਉੱਤਰੀ ਕੋਰੀਆ ਦਾ ਦੌਰਾ ਕੀਤਾ ਅਤੇ ਨੇਤਾ ਕਿਮ ਜੋਂਗ ਉਨ ਨਾਲ ਰੱਖਿਆ ਸਮਝੌਤਾ ਕੀਤਾ। ਇਸ ਦੌਰਾਨ ਸ਼ਨੀਵਾਰ ਨੂੰ ਪਰਮਾਣੂ ਊਰਜਾ ‘ਤੇ ਚੱਲਣ ਵਾਲਾ ਅਮਰੀਕੀ ਜਹਾਜ਼ ਵਾਹਕ ਥਿਓਡੋਰ ਰੂਜ਼ਵੇਲਟ ਦੱਖਣੀ ਕੋਰੀਆ ਦੇ ਬੰਦਰਗਾਹ ਸ਼ਹਿਰ ਬੁਸਾਨ ਪਹੁੰਚ ਗਿਆ। ਦੱਖਣੀ ਕੋਰੀਆਈ ਜਲ ਸੈਨਾ ਮੁਤਾਬਕ ਇਹ ਜਹਾਜ਼ ਦੱਖਣੀ ਕੋਰੀਆ ਅਤੇ ਜਾਪਾਨ ਦੇ ਨਾਲ ਇਸ ਸੰਯੁਕਤ ਫੌਜੀ ਅਭਿਆਸ ‘ਚ ਹਿੱਸਾ ਲਵੇਗਾ। ਤੁਹਾਨੂੰ ਦੱਸ ਦੇਈਏ ਕਿ ਅਗਸਤ 2023 ਵਿੱਚ ਕੈਂਪ ਡੇਵਿਡ ਸੰਮੇਲਨ ਵਿੱਚ, ਤਿੰਨਾਂ ਦੇਸ਼ਾਂ ਦੇ ਨੇਤਾ ਸਾਲਾਨਾ ਫੌਜੀ ਸਿਖਲਾਈ ਅਭਿਆਸ ਆਯੋਜਿਤ ਕਰਨ ਲਈ ਸਹਿਮਤ ਹੋਏ ਸਨ, ਇਨ੍ਹਾਂ ਦੇਸ਼ਾਂ ਨੇ ਦੱਖਣੀ ਚੀਨ ਸਾਗਰ ਦੇ ਵਿਵਾਦਿਤ ਜਲ ਮਾਰਗਾਂ ਵਿੱਚ ਚੀਨ ਦੇ ਵਿਵਹਾਰ ਨੂੰ ਖਤਰਨਾਕ ਅਤੇ ਹਮਲਾਵਰ ਦੱਸਕੇ ਇਸਦੀ ਨਿੰਦਾ ਕੀਤੀ ਸੀ।