ਮਾਲਵਾ ਖੇਤਰ ਦੇ ਦੋ ਜ਼ਿਲ੍ਹਿਆਂ ’ਚੋਂ ਦਿੱਲੀ ਜਾਣ ਦਾ ਸੜਕੀ ਰਾਹ ਹੋਇਆ ਸੁਖਾਲਾ
ਵਿਧਾਇਕ ਗੁਰਪ੍ਰੀਤ ਸਿੰਘ ਬਣਾਂਵਾਲੀ ਨੇ 10-15 ਸਾਲਾਂ ਤੋਂ ਟੁੱਟੀਆਂ ਸੜਕਾਂ ਦੇ ਲਗਵਾਏ ਨਵੇਂ ਟੈਂਡਰ
ਮਾਨਸਾ, 23 ਮਈ(ਵਿਸ਼ਵ ਵਾਰਤਾ)- ਮਾਲਵਾ ਖੇਤਰ ਦੇ ਲੋਕਾਂ ਨੂੰ ਹੁਣ ਦਿੱਲੀ ਜਾਣ ਦਾ ਸੜਕੀ ਰਾਹ ਸੁਖਾਲਾ ਹੋ ਜਾਵੇਗਾ। ਪਹਿਲਾਂ ਮਾਨਸਾ ਤੇ ਬਠਿੰਡਾ ਜ਼ਿਲ੍ਹੇ ਦੇ ਲੋਕਾਂ ਨੂੰ ਮਾੜੀਆਂ ਤੇ ਟੁੱਟੀਆਂ ਸੜਕਾਂ ਉਤੋਂ ਦੀ ਸਫ਼ਰ ਕਰਕੇ ਹਰਿਆਣਾ ਦੇ ਜੀ.ਟੀ ਰੋਡ ਰਾਹੀਂ ਦਿੱਲੀ ਜਾਇਆ ਜਾਂਦਾ ਸੀ, ਹੁਣ ਪੰਜਾਬ ਦੇ ਮਾਨਸਾ ਜ਼ਿਲ੍ਹੇ ਦੇ ਹਿੱਸੇ ਵਾਲੀਆਂ ਟੁੱਟੀਆਂ ਸੜਕਾਂ ਦੀ ਨਵੇਂ ਸਿਰੇ ਤੋਂ ਮੁਰੰਮਤ ਦੇ ਟੈਂਡਰ ਪਾਸ ਹੋ ਗਏ ਹਨ, ਜਿਸ ਕਰਕੇ ਦਿੱਲੀ ਜਾਣ-ਆਉਣ ਵਾਲੇ ਲੋਕਾਂ ਦਾ ਰਾਹ ਸੌਖਾ ਹੋ ਜਾਵੇਗਾ।
ਮਾਨਸਾ ਜ਼ਿਲ੍ਹੇ ਦੇ ਵਿਧਾਨ ਸਭਾ ਹਲਕਾ ਸਰਦੂਲਗੜ੍ਹ ਤੋਂ ਆਮ ਆਦਮੀ ਪਾਰਟੀ ਦੇ ਵਿਧਾਇਕ ਗੁਰਪ੍ਰੀਤ ਸਿੰਘ ਬਣਾਂਵਾਲੀ ਨੇ ਦੱਸਿਆ ਕਿ ਦਿੱਲੀ ਜਾਣ ਲਈ ਸਰਦੂਲੇਵਾਲਾ ਤੋਂ ਰੋੜੀ ਤੱਕ, ਸਰਦੂਲਗੜ੍ਹ ਤੋਂ ਹਾਂਸਪੁਰ ਰਤੀਆ ਵਾਲੀ ਸੜਕ ਅਤੇ ਜਟਾਣਾ ਕੈਂਚੀਆਂ ਤੋਂ ਜਟਾਣਾ ਕਲਾਂ,ਕੁਸਲਾ,ਮੀਆ,ਜ਼ੋੜਕੀਆਂ,ਨਥੇਹਾ ਤੱਕ ਤਿੰਨਾਂ ਸੜਕਾਂ ਦੇ ਟੈਂਡਰ ਹੋ ਗਏ ਹਨ, ਜਿੰਨਾਂ ਦਾ ਅਗਲੇ ਦਸ ਦਿਨਾਂ ਤੱਕ ਕੰਮ ਆਰੰਭ ਹੋ ਜਾਵੇਗਾ।
ਵਿਧਾਇਕ ਨੇ ਅੱਜ ਇਥੇ ਕੁੱਝ ਚੋਣਵੇਂ ਪੱਤਰਕਾਰਾਂ ਨੂੰ ਦੱਸਿਆ ਕਿ ਮਾਨਸਾ ਅਤੇ ਬਠਿੰਡਾ ਜ਼ਿਲ੍ਹੇ ’ਚੋਂ ਅੱਜਕੱਲ੍ਹ ਸਭ ਤੋਂ ਵੱਧ ਵਿਦਿਆਰਥੀ ਦਿੱਲੀ ਦੇ ਹਵਾਈ ਅੱਡੇ ਉਤੇ ਵਿਦੇਸ਼ ਜਾਣ-ਆਉਣ ਲਈ ਜਾਂਦੇ ਅਤੇ ਆਉਂਦੇ ਹਨ। ਉਨ੍ਹਾਂ ਦੱਸਿਆ ਕਿ ਉਨ੍ਹਾਂ ਨੂੰ ਸਰਦੂਲੇਵਾਲਾ ਤੋਂ ਰੋੜੀ (ਹਰਿਆਣਾ) ਤੱਕ ਅਤੇ ਸਰਦੂਲਗੜ੍ਹ ਤੋਂ ਹਾਂਸਪੁਰ ਰਤੀਆ ਤੱਕ, ਨਥੇਹਾ ਤੋਂ ਜਟਾਣਾ ਕੈਂਚੀਆਂ ਤੱਕ ਪੁੱਜਣ ਲਈ ਟੁੱਟੀ ਸੜਕ ਹੋਣ ਕਾਰਨ ਭਾਰੀ ਦੁਬਿਧਾ ਭਰਿਆ ਸਫ਼ਰ ਕਰਨ ਲਈ ਮਜ਼ਬੂਰ ਹੋਣਾ ਪੈਂਦਾ ਸੀ। ਉਨ੍ਹਾਂ ਕਿਹਾ ਕਿ ਬਠਿੰਡਾ ਤੋਂ ਜਾਣ ਵਾਲੇ ਲੋਕਾਂ ਨੂੰ ਇਸੇ ਰਸਤੇ ਅਤੇ ਮਾਨਸਾ ਜ਼ਿਲ੍ਹੇ ’ਚੋਂ ਜਾਣ ਵਾਲੇ ਲੋਕਾਂ ਨੂੰ ਵੀ ਇਸੇ ਰਸਤੇ ਰਾਹੀਂ ਔਖਿਆਈ ਭਰਿਆ ਸਫ਼ਰ ਕਰਨਾ ਪੈਂਦਾ ਸੀ। ਉਨ੍ਹਾਂ ਕਿਹਾ ਕਿ ਹੁਣ ਜਦੋਂ ਇਹ ਤਿੰਨੋਂ ਸੜਕਾਂ ਤਿਆਰ ਹੋ ਗਈਆਂ ਤਾਂ ਲੋਕਾਂ ਨੂੰ ਵਾਇਆ ਫ਼ਤਿਆਬਾਦ-ਹਿਸਾਰ ਹੋਕੇ ਦਿੱਲੀ ਜਾਣ ਵਿੱਚ ਕੋਈ ਦਿੱਕਤ ਨਹੀਂ ਆਵੇਗੀ ਅਤੇ ਉਨ੍ਹਾਂ ਸਫ਼ਰ ਸੁਖਾਲਾ ਹੋ ਜਾਵੇਗਾ। ਉਨ੍ਹਾਂ ਦੱਸਿਆ ਕਿ ਇਨ੍ਹਾਂ ਸੜਕਾਂ ਦੀ ਪਿਛਲੇ 10-15 ਸਾਲਾਂ ਤੋਂ ਮੁਰੰਮਤ ਨਾ ਹੋਣ ਕਰਕੇ ਹਾਲਤ ਬਹੁਤ ਹੀ ਖਸਤਾ ਬਣੀ ਹੋਈ ਸੀ ਅਤੇ ਕਿਤੇ-ਕਿਤੇ ਤਾਂ ਸੜਕ ਦਾ ਵਜੂਦ ਵੀ ਨਹੀਂ ਰਿਹਾ ਸੀ। ਉਨ੍ਹਾਂ ਦੱਸਿਆ ਕਿ ਦਿੱਲੀ ਜਾਣ ਵਾਲੇ ਲੋਕਾਂ ਨੂੰ ਅਨੇਕਾਂ ਵਾਰ ਮਾੜੀਆਂ ਸੜਕਾਂ ਕਾਰਨ ਦੁਰਘਟਨਾਵਾਂ ਦਾ ਸ਼ਿਕਾਰ ਵੀ ਹੋਣਾ ਪਿਆ ਹੈ।
