ਪਤੀ ਦੇ ਕਤਲ ਦੇ ਦੋਸ਼ ‘ਚ ਨਾਮਜ਼ਦ ਪਤਨੀ ਤੇ ਹੋਰ ਬਰੀ

ਪਟਿਆਲਾ, 25 ਜਨਵਰੀ (ਵਿਸ਼ਵ ਵਾਰਤਾ) : ਪਟਿਆਲਾ ਦੇ ਐਡੀਸ਼ਨਲ ਸੈਸ਼ਨ ਜੱਜ ਰਾਜੀਵ ਕਾਲੜਾ ਦੀ ਅਦਾਲਤ ਨੇ ਅੱਜ ਲਾਪਤਾ ਪ੍ਰਦੀਪ ਸਿੰਘ ਦੇ ਕੇਸ ਵਿਚ ਨਾਮਜ਼ਦ ਉਨ੍ਹਾਂ ਦੀ ਪਤਨੀ ਅਮਨਦੀਪ ਕੌਰ, ਗੁਰਪ੍ਰਤਾਪ ਸਿੰਘ, ਅਜੇ ਕੁਮਾਰ, ਆਸ਼ੂ ਕੁਮਾਰ ਅਤੇ ਸੰਦੀਪ ਸਿੰਘ ਨੂੰ, ਜੋ ਕਿ ਪੁਲਿਸ ਨੇ ਧਾਰਾ 302 ਅਧੀਨ ਗ੍ਰਿਫਤਾਰ ਕੀਤੇ ਹੋਏ ਸਨ, ਨੂੰ ਸਬੂਤਾਂ ਦੀ ਅਣਹੋਂਦ ਕਾਰਨ ਬਰੀ ਕਰ ਦਿੱਤਾ|
ਪ੍ਰਦੀਪ ਸਿੰਘ 21-1-2015 ਨੂੰ ਲਾਪਤ ਹੋ ਗਿਆ ਸੀ, ਜਿਸ ਦੀ ਗੁੰਮਸ਼ੁਦਗੀ ਦੀ ਰਿਪੋਰਟ ਉਸਦੀ ਪਤਨੀ ਨੇ ਪੁਲਿਸ ਕੋਲ ਦਰਜ ਕਰਵਾਈ ਸੀ, ਪਰ ਉਸ ਤੋਂ ਬਾਅਦ ਲਾਪਤਾ ਪ੍ਰਦੀਪ ਸਿੰਘ ਦੇ ਭਰਾ ਕਿਰਨਦੀਪ ਸਿੰਘ ਨੇ ਪੁਲਿਸ ਨੂੰ ਇਹ ਸ਼ਿਕਾਇਤ ਕੀਤੀ ਕਿ ਉਸ ਦੇ ਭਰਾ ਨੂੰ ਉਸ ਦੀ ਭਾਬੀ ਨੇ ਮਾਰ ਕੇ ਨਹਿਰ ਵਿਚ ਸੁੱਟ ਦਿੱਤਾ ਸੀ| ਜਿਸ ਉਤੇ ਪੁਲਿਸ ਨੇ ਉਕਤ ਪੰਜਾਂ ਦੋਸ਼ੀਆਂ ਨੂੰ ਗ੍ਰਿਫਤਾਰ ਕਰ ਲਿਆ ਸੀ, ਜਿਸ ਬਾਰੇ ਅੱਜ ਦੋਸ਼ੀਆਂ ਵੱਲੋਂ ਸਚਿਨ ਸ਼ਰਮਾ, ਐੱਸ.ਐੱਸ. ਕਲੇਰ ਤੇ ਮਿਸਟਰ ਸੱਗੂ ਵਕੀਲ ਪੇਸ਼ ਹੋਏ ਤੇ ਉਨ੍ਹਾਂ ਦੀਆਂ ਦਲੀਲਾਂ ਨੂੰ ਮੰਨਦਿਆਂ ਮਾਣਯੋਗ ਅਦਾਲਤ ਨੇ ਪੰਜਾਂ ਦੋਸ਼ੀਆਂ ਨੂੰ ਬਰੀ ਕਰ ਦਿੱਤਾ|