ਕਾਂਗਰਸ ਦੇ ਅਮੇਠੀ ਉਮੀਦਵਾਰ ਦਾ ਪੰਜਾਬ ਕਨੈਕਸ਼ਨ: ਲੁਧਿਆਣਾ ਦੇ ਕਿਸ਼ੋਰੀ ਲਾਲ, ਗਾਂਧੀ ਪਰਿਵਾਰ ਦੇ ਵਫ਼ਾਦਾਰ
ਚੰਡੀਗੜ੍ਹ, 6ਮਈ(ਵਿਸ਼ਵ ਵਾਰਤਾ)- ਕਰੀਬ ਚਾਲੀ ਸਾਲ ਪਹਿਲਾਂ ਸਾਬਕਾ ਪ੍ਰਧਾਨ ਮੰਤਰੀ ਰਾਜੀਵ ਗਾਂਧੀ ਨੇ ਲੁਧਿਆਣਾ ਵਾਸੀ ਕਿਸ਼ੋਰੀ ਲਾਲ ਸ਼ਰਮਾ ਨੂੰ ਯੂਥ ਕਾਂਗਰਸ ਦਾ ਕੋਆਰਡੀਨੇਟਰ ਬਣਾਇਆ ਸੀ ਅਤੇ ਇਸ ਤੋਂ ਬਾਅਦ ਸ਼ਰਮਾ ਨੇ ਪਿੱਛੇ ਮੁੜ ਕੇ ਨਹੀਂ ਦੇਖਿਆ ਅਤੇ ਅੱਜ ਉਹ ਗਾਂਧੀ ਪਰਿਵਾਰ ਦੀ ਰਵਾਇਤੀ ਸੀਟ ਅਮੇਠੀ ਤੋਂ ਕਾਂਗਰਸ ਦੇ ਉਮੀਦਵਾਰ ਬਣ ਗਏ ਹਨ।ਕਿਸ਼ੋਰੀ ਲਾਲ ਪਹਿਲੀ ਵਾਰ ਲੋਕ ਸਭਾ ਚੋਣ ਲੜ ਰਹੇ ਹਨ ਅਤੇ ਉਹ ਵੀ ਦੇਸ਼ ਦੀ ਵੱਕਾਰੀ ਸੀਟ ਅਮੇਠੀ ਤੋਂ। ਕਾਂਗਰਸ ਦੇ ਉਮੀਦਵਾਰ ਬਣਦੇ ਹੀ ਸ਼ਰਮਾ ਦਾ ਪੂਰਾ ਪਰਿਵਾਰ ਅਮੇਠੀ ਲਈ ਰਵਾਨਾ ਹੋ ਗਿਆ ਹੈ ਅਤੇ ਉੱਥੇ ਕਿਸ਼ੋਰੀ ਲਾਲ ਦੇ ਚੋਣ ਪ੍ਰਚਾਰ ਦੀ ਕਮਾਨ ਸੰਭਾਲੇਗਾ।
ਲੁਧਿਆਣਾ ਦੇ ਸ਼ਿਵਾਜੀ ਨਗਰ ਦਾ ਰਹਿਣ ਵਾਲਾ ਕਿਸ਼ੋਰੀ ਲਾਲ ਆਪਣੀ ਗ੍ਰੈਜੂਏਸ਼ਨ ਦੀ ਡਿਗਰੀ ਪੂਰੀ ਕਰਕੇ ਦਿੱਲੀ ਚਲਾ ਗਏ ਸਨ। ਕਿਹਾ ਜਾਂਦਾ ਹੈ ਕਿ ਰਾਜੀਵ ਗਾਂਧੀ ਨੇ ਕਿਸ਼ੋਰੀ ਲਾਲ ਨੂੰ ਕਈ ਜ਼ਿੰਮੇਵਾਰੀਆਂ ਦਿੱਤੀਆਂ ਸਨ। ਜਿਸ ਨੂੰ ਉਹਨਾਂ ਨੇ ਬਾਖੂਬੀ ਨਿਭਾਇਆ। ਇਸੇ ਕਰਕੇ ਉਹ ਉਹਨਾਂ ਦੇ ਕਰੀਬੀ ਸਨ। ਸੋਨੀਆ ਗਾਂਧੀ ਨੇ ਉਨ੍ਹਾਂ ਨੂੰ ਰਾਏਬਰੇਲੀ ਤੋਂ ਸੰਸਦ ਮੈਂਬਰ ਵੀ ਬਣਾਇਆ ਸੀ। ਰਾਜੀਵ ਗਾਂਧੀ ਦੀ ਮੌਤ ਤੋਂ ਬਾਅਦ ਹੀ ਉਹ ਗਾਂਧੀ ਪਰਿਵਾਰ ਦੇ ਨੇੜੇ ਆਏ। ਉਹਨਾਂ ਨੇ ਰਾਏਬਰੇਲੀ ਅਤੇ ਅਮੇਠੀ ਵਿੱਚ ਪੂਰੀ ਜ਼ਿੰਮੇਵਾਰੀ ਨਾਲ ਗਾਂਧੀ ਪਰਿਵਾਰ ਲਈ ਕੰਮ ਕੀਤਾ।
ਸ਼ਰਮਾ ਦਾ ਪਰਿਵਾਰ ਮੂਲ ਰੂਪ ਤੋਂ ਹੁਸ਼ਿਆਰਪੁਰ ਦੇ ਪਿੰਡ ਭਵਾਨੀਪੁਰ ਦਾ ਰਹਿਣ ਵਾਲਾ ਹੈ। ਉਹਨਾਂ ਦੇ ਪਿਤਾ ਅਮਰਨਾਥ ਸ਼ਰਮਾ ਦਾ ਮਲੇਰਕੋਟਲਾ ਵਿੱਚ ਬੇਕਰੀ ਦਾ ਕਾਰੋਬਾਰ ਸੀ। ਉਸ ਤੋਂ ਬਾਅਦ ਉਨਾਂ ਦੇ ਪਿਤਾ ਪਰਿਵਾਰ ਸਮੇਤ ਲੁਧਿਆਣਾ ਆ ਕੇ ਰਹਿਣ ਲੱਗ ਪਏ। ਉਹ ਆਪਣੇ ਪਰਿਵਾਰ ਦੇ ਨਾਲ ਕਾਰੋਬਾਰ ਵਿੱਚ ਵੀ ਸਰਗਰਮ ਸੀ। ਕਿਸ਼ੋਰੀ ਲਾਲ ਸ਼ਰਮਾ ਦਾ ਜਨਮ ਅਕਤੂਬਰ 1950 ਵਿੱਚ ਮਲੇਰਕੋਟਲਾ ਵਿੱਚ ਹੋਇਆ ਸੀ। ਉਨ੍ਹਾਂ ਦਾ ਵਿਆਹ ਸਾਲ 1992 ‘ਚ ਕਿਰਨ ਬਾਲਾ ਨਾਲ ਹੋਇਆ ਸੀ।
ਕਿਸ਼ੋਰੀ ਦਾ ਕਾਰੋਬਾਰ ਹੁਣ ਉਸਦੀ ਪਤਨੀ ਸੰਭਾਲ ਰਹੀ ਹੈ। ਉਸ ਦੀਆਂ ਦੋ ਧੀਆਂ ਹਨ। ਜਦੋਂ ਰਾਹੁਲ ਗਾਂਧੀ ਫਰਵਰੀ 2022 ਵਿੱਚ ਲੁਧਿਆਣਾ ਆਏ ਸਨ ਤਾਂ ਉਹ ਕਿਸ਼ੋਰੀ ਲਾਲ ਦੇ ਘਰ ਵੀ ਗਏ ਸਨ। ਉਥੇ ਪਰਿਵਾਰਕ ਮੈਂਬਰਾਂ ਨਾਲ ਮੁਲਾਕਾਤ ਕੀਤੀ। ਕਿਸ਼ੋਰੀ ਦੇ ਚਚੇਰੇ ਭਰਾ ਰਾਮ ਪਾਲ ਸ਼ਰਮਾ ਨੇ ਕਿਹਾ ਕਿ ਇਹ ਉਨ੍ਹਾਂ ਲਈ ਮਾਣ ਵਾਲੀ ਗੱਲ ਹੈ ਕਿ ਉਹ ਅਮੇਠੀ ਤੋਂ ਚੋਣ ਲੜ ਰਹੇ ਹੈ। ਪੰਜ ਦਿਨ ਪਹਿਲਾਂ ਕਿਸ਼ੋਰੀ ਲਾਲ ਲੁਧਿਆਣਾ ਵਿੱਚ ਸੀ। ਹਾਈਕਮਾਂਡ ਤੋਂ ਸੰਕੇਤ ਮਿਲਣ ਤੋਂ ਬਾਅਦ ਉਹ ਸਿੱਧੇ ਦਿੱਲੀ ਚਲੇ ਗਏ। ਜਦੋਂ ਰਾਹੁਲ ਗਾਂਧੀ ਦੀ ਭਾਰਤ ਬਚਾਓ ਯਾਤਰਾ ਲੁਧਿਆਣਾ ਪਹੁੰਚੀ ਸੀ ਤਾਂ ਵੀ ਰਾਹੁਲ ਅਤੇ ਕਿਸ਼ੋਰੀ ਇਕੱਠੇ ਹੀ ਸਨ। ਸਪੱਸ਼ਟ ਹੈ ਕਿ ਕਿਸ਼ੋਰੀ ਲਾਲ ਸ਼ਰਮਾ ਦਾ ਗਾਂਧੀ ਪਰਿਵਾਰ ਅਤੇ 10 ਜਨਪਥ ‘ਤੇ ਪੂਰਾ ਪ੍ਰਭਾਵ ਹੈ।
