੍ਹ ਡੀ.ਸੀ. ਗਿਰੀਸ਼ ਦਿਆਲਨ ਨੇ ਪ੍ਰਬੰਧਾਂ ਦਾ ਜਾਇਜ਼ਾ ਲੈਣ ਲਈ ਅਧਿਕਾਰੀਆਂ ਨਾਲ ਕੀਤੀ ਮੀਟਿੰਗ
੍ਹ ਵੱਡੇ ਨਿਵੇਸ਼ ਵਾਲੇ ਪ੍ਰਾਜੈਕਟ ਲਾਉਣ ਲਈ ਮੁਹਾਲੀ ਤਿਆਰ-ਬਰ-ਤਿਆਰ
ਐਸ.ਏ.ਐਸ. ਨਗਰ, 30 ਨਵੰਬਰ;ਡਿਪਟੀ ਕਮਿਸ਼ਨਰ ਐਸ.ਏ.ਐਸ. ਨਗਰ ਸ੍ਰੀ ਗਿਰੀਸ਼ ਦਿਆਲਨ ਨੇ ਕਿਹਾ ਹੈ ਕਿ 5 ਤੇ 6 ਦਸੰਬਰ ਨੂੰ ਇੰਡੀਅਨ ਸਕੂਲ ਆਫ਼ ਬਿਜ਼ਨਸ (ਆਈ.ਐਸ.ਬੀ.) ਮੁਹਾਲੀ ਵਿੱਚ ਹੋਣ ਜਾ ਰਿਹਾ ਪ੍ਰੋਗਰੈਸਿਵ ਪੰਜਾਬ ਇਨਵੈਸਟਰਜ਼ ਸੰਮੇਲਨ ਸਨਅਤ ਤੇ ਰੋਜ਼ਗਾਰ ਉਤਪਤੀ ਲਈ ਬੇਹੱਦ ਲਾਹੇਵੰਦ ਸਾਬਤ ਹੋਵੇਗਾ। ਸੰਮੇਲਨ ਦੇ ਪ੍ਰਬੰਧਾਂ ਦਾ ਜਾਇਜ਼ਾ ਲੈਣ ਲਈ ਅਧਿਕਾਰੀਆਂ ਨਾਲ ਮੀਟਿੰਗ ਤੋਂ ਬਾਅਦ ਉਨ੍ਹਾਂ ਕਿਹਾ ਕਿ ਮੁਹਾਲੀ ਸੂਚਨਾ ਤਕਨਾਲੋਜੀ (ਆਈ.ਟੀ.) ਦੇ ਵੱਡੇ ਗੜ੍ਹ ਵਜੋਂ ਤੇਜ਼ੀ ਨਾਲ ਵਿਕਸਤ ਹੋ ਰਿਹਾ ਹੈ ਅਤੇ ਇਹ ਸ਼ਹਿਰ ਐਸ.ਟੀ.ਪੀ.ਆਈ., ਕੁਆਰਕ ਸਿਟੀ, ਬੈਸਟੈੱਕ ਟਾਵਰਜ਼ ਜਿਹੀਆਂ ਥਾਵਾਂ ਵਿੱਚ ਵੱਡੇ ਨਿਵੇਸ਼ ਲਈ ਤਿਆਰ-ਬਰ-ਤਿਆਰ ਹੈ। ਇਸ ਤੋਂ ਇਲਾਵਾ ਸ਼ਹਿਰ ਵਿੱਚ ਹੋਰ ਆਈ.ਟੀ. ਪਾਰਕਾਂ ਦੇ ਨਾਲ ਨਾਲ ਕੁਆਰਕ ਤੇ ਬੈਸਟੈੱਕ ਵਰਗੀਆਂ ਕੰਪਨੀਆਂ ਵੀ ਮੌਜੂਦ ਹਨ।
ਸ੍ਰੀ ਦਿਆਲਨ ਨੇ ਕਿਹਾ ਕਿ ਐਸ.ਟੀ.ਪੀ.ਆਈ. ਮੁਹਾਲੀ ਪੰਜਾਬ ਸਟਾਰਟਅੱਪ ਗੜ੍ਹ ਵਜੋਂ ਉਭਰਿਆ ਹੈ, ਜਿਸ ਵਿੱਚ ਮੌਜੂਦ 150 ਤੋਂ ਵੱਧ ਕੰਪਨੀਆਂ 4400 ਕਰੋੜ ਰੁਪਏ ਦੀਆਂ ਬਰਾਮਦਾਂ ਕਰ ਰਹੀਆਂ ਹਨ ਅਤੇ 35 ਹਜ਼ਾਰ ਪੇਸ਼ੇਵਾਰਾਂ ਨੂੰ ਰੋਜ਼ਗਾਰ ਮੁਹੱਈਆ ਕਰ ਰਹੀਆਂ ਹਨ। ਉਨ੍ਹਾਂ ਕਿਹਾ ਕਿ ਆਈ.ਟੀ. ਵਿਭਾਗ ਨੇ ਐਸ.ਟੀ.ਪੀ.ਆਈ. ਦੀ ਭਾਈਵਾਲੀ ਨਾਲ ਅੰਮ੍ਰਿਤਸਰ ਵਿੱਚ ਇਕ ਹੋਰ ਐਸ.ਟੀ.ਪੀ.ਆਈ. ਇਨਕਿਊਬੇਸ਼ਨ ਸੈਂਟਰ ਤਿਆਰ ਕਰ ਰਿਹਾ ਹੈ, ਜੋ ਤਕਰੀਬਨ ਤਿੰਨ ਏਕੜ ਵਿੱਚ ਤਿਆਰ ਹੋ ਰਿਹਾ ਹੈ, ਜਿਸ ਉਤੇ 20 ਕਰੋੜ ਤੋਂ ਵੱਧ ਲਾਗਤ ਆਉਣ ਦਾ ਅਨੁਮਾਨ ਹੈ।
ਉਨ੍ਹਾਂ ਦੱਸਿਆ ਕਿ ਆਈ.ਟੀ. ਸਨਅਤ ਨੂੰ ਖਿੱਚਣ ਅਤੇ ਆਈ.ਟੀ. ਪਾਰਕ ਵਿਕਸਤ ਕਰਨ ਲਈ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਦੀ ਅਗਵਾਈ ਵਿੱਚ ਸੂਬਾ ਸਰਕਾਰ ਨੇ ਗਮਾਡਾ ਜ਼ਰੀਏ ਆਈ.ਟੀ. ਸਿਟੀ ਮੁਹਾਲੀ ਵਿੱਚ ਆਲਮੀ ਪੱਧਰ ਦੀਆਂ ਅਤਿ ਆਧੁਨਿਕ ਸਹੂਲਤਾਂ ਵਾਲੇ ਪਲਾਟਾਂ ਦੀ ਪੇਸ਼ਕਸ਼ ਕੀਤੀ ਹੈ। ਕੌਮਾਂਤਰੀ ਹਵਾਈ ਅੱਡਾ ਮੁਹਾਲੀ ਨੇੜੇ ਵਿਕਸਤ ਹੋ ਰਹੀ ਆਈ.ਟੀ. ਅਜਿਹੀ ਜਗ੍ਹਾ ਸਥਿਤ ਹੈ, ਜਿੱਥੋਂ ਟਰਾਈ ਸਿਟੀ ਦੀਆਂ ਸਾਰੀਆਂ ਘੁੰਮਣ ਵਾਲੀਆਂ ਥਾਵਾਂ ਨੇੜੇ ਪੈਂਦੀਆਂ ਹਨ। ਬਹੁਤ ਹੀ ਬਾਰੀਕਬੀਨੀ ਨਾਲ ਯੋਜਨਾਬੱਧ ਕੀਤੀ ਇਹ ਸਿਟੀ ਮੋਹਰੀ ਸਨਅਤੀ ਘਰਾਣਿਆਂ ਅਤੇ ਪ੍ਰਸਿੱਧ ਕੌਮੀ ਬਿਲਡਰਾਂ ਦਾ ਧਿਆਨ ਖਿੱਚ ਰਹੀ ਹੈ। ਇੰਡੀਅਨ ਸਕੂਲ ਆਫ਼ ਬਿਜ਼ਨਸ (ਆਈ.ਐਸ.ਬੀ.), ਨੈਸ਼ਨਲ ਇੰਸਟੀਚਿਊਟ ਆਫ਼ ਫਾਰਮਾਸਿਊਟੀਕਲ ਐਜੂਕੇਸ਼ਨ ਐਂਡ ਰਿਸਰਚ (ਨਾਈਪਰ), ਇੰਡੀਅਨ ਇੰਸਟੀਚਿਊਟ ਆਫ਼ ਸਾਇੰਸ ਐਜੂਕੇਸ਼ਨ ਐਂਡ ਰਿਸਰਚ (ਆਈਸਰ), ਨੈਸ਼ਨਲ ਐਗਰੀ ਫੂਡ ਬਾਇਓਟੈਕਨਾਲੋਜੀ ਇੰਸਟੀਚਿਊਟ (ਨਾਬੀ) ਦੀ ਮੌਜੂਦਗੀ ਮੁਹਾਲੀ ਨੂੰ ਪੰਜਾਬ ਦਾ ਨਵੀਨ ਤੇ ਤਕਨੀਕੀ ਗੜ੍ਹ ਵਜੋਂ ਵਿਕਸਤ ਕਰਨ ਵਿੱਚ ਮਦਦਗਾਰ ਸਾਬਤ ਹੋ ਰਹੀ ਹੈ।
ਡਿਪਟੀ ਕਮਿਸ਼ਨਰ ਨੇ ਦੱਸਿਆ ਕਿ ਅੰਕੜਿਆਂ ਮੁਤਾਬਕ ਪੰਜਾਬ ਸਰਕਾਰ ਦੀ ਅਗਾਂਹਵਧੂ ਨੀਤੀਗਤ ਪਹੁੰਚ ਅਤੇ ਨਿਵੇਸ਼ਕਾਂ ਦੀ ਪ੍ਰਤੀਕਿਰਿਆ ਜਾਣਨ ਲਈ ਬਣਾਏ ਸਰਗਰਮ ਤਾਲਮੇਲ ਨਾਲ ਆਈ.ਟੀ. ਖੇਤਰ ਵਿੱਚ ਵਿੱਤੀ ਸਾਲ 2018-19 ਦੌਰਾਨ ਜ਼ਿਕਰਯੋਗ ਵਾਧਾ ਦਰਜ ਕੀਤਾ ਗਿਆ ਅਤੇ ਵਿੱਤੀ ਸਾਲ 2017-18 ਦੇ ਮੁਕਾਬਲੇ ਇਹ 200 ਫੀਸਦੀ ਤੋਂ ਵੀ ਜ਼ਿਆਦਾ ਵਧ ਕੇ 369 ਕਰੋੜ ਰੁਪਏ ਨੂੰ ਛੂਹ ਗਿਆ। ਉਨ੍ਹਾਂ ਕਿਹਾ ਕਿ ਅਨੁਮਾਨ ਮੁਤਾਬਕ ਇਸ ਨਾਲ 7200 ਆਈ.ਟੀ. ਪੇਸ਼ਵਰਾਂ ਲਈ ਨੌਕਰੀ ਦੇ ਮੌਕੇ ਪੈਦਾ ਹੋਏ। ਵਿੱਤੀ ਸਾਲ 2018-19 ਦੌਰਾਨ ਹੋਰਾਂ ਤੋਂ ਇਲਾਵਾ ਸੀ.ਆਰ.ਐਮ., ਮੈਰੀਟੈੱਕ, ਕਿੰਡਲਬਿਟ ਸਲਿਊਸ਼ਨਜ਼, ਨੈਟਸਮਾਰਟਜ਼, ਕਲਿੱਕ ਲੈਬਜ਼, ਬਜਾਜ ਇਲੈਕਟ੍ਰਾਨਿਕਸ ਵਰਗੀਆਂ ਕੰਪਨੀਆਂ ਨੇ ਨਿਵੇਸ਼ ਕੀਤਾ।
ਵਿੱਤੀ ਵਰ੍ਹੇ ਸਾਲ 2017-18 ਦੌਰਾਨ ਆਈ.ਟੀ. ਖੇਤਰ ਵਿੱਚ ਨਿਵੇਸ਼ 121.49 ਕਰੋੜ ਰੁਪਏ ਸੀ, ਜਿਨ੍ਹਾਂ ਵਿੱਚ ਸਮਾਰਟ ਡੇਟਾ, ਦ੍ਰਿਸ਼ ਇਨਫੋਟੈੱਕ, ਆਊਟਲਾਈਨ ਸਿਸਟਮਜ਼ ਵਰਗੀਆਂ ਵੱਡੀਆਂ ਆਈ.ਟੀ. ਕੰਪਨੀਆਂ ਨੇ ਨਿਵੇਸ਼ ਕੀਤਾ ਸੀ, ਜਦੋਂ ਕਿ ਸਾਲ 2016-17 ਦੇ ਵਿੱਤੀ ਵਰ੍ਹੇ ਵਿੱਚ ਇਹ ਨਿਵੇਸ਼ 252.93 ਕਰੋੜ ਰੁਪਏ ਸੀ ਅਤੇ ਵੱਡੇ ਨਿਵੇਸ਼ਕਾਂ ਵਿੱਚ ਨਾਥ ਆਊਟਸੋਰਸਿੰਗ, ਕੋਗਨੇਸੋਲ, ਵਨ ਬਿਜ਼ਨਸ ਤੇ ਐਚ.ਡੀ.ਐਫ.ਸੀ. ਵਗੈਰਾ ਸ਼ਾਮਲ ਸਨ। ਇਨਫੋਸਿਸ ਲਿਮੀਟਿਡ ਨੇ ਸਾਲ 2015-16 ਵਿੱਚ ਆਈ.ਟੀ. ਸਿਟੀ ਵਿੱਚ ਆਪਣਾ ਕੰਮਕਾਜ ਸ਼ੁਰੂ ਕੀਤਾ ਅਤੇ ਹੁਣ ਕੰਪਨੀ ਆਪਣੇ ਵਿਸਤਾਰ ਦੇ ਦੂਜੇ ਪੜਾਅ ਵਿੱਚੋਂ ਲੰਘ ਰਹੀ ਹੈ। ਇਨਫੋਸਿਸ ਤੋਂ ਬਾਅਦ ਕਈ ਆਈ.ਟੀ. ਕੰਪਨੀਆਂ ਨੇ ਆਈ.ਟੀ. ਸਿਟੀ ਮੁਹਾਲੀ ਦਾ ਰੁਖ਼ ਕੀਤਾ ਹੈ। ਉਨ੍ਹਾਂ ਕਿਹਾ ਕਿ ਸੂਬੇ ਕੋਲ ਆਪਣਾ ਮਜ਼ਬੂਤ ਆਈ.ਟੀ. ਤੇ ਇਲੈਕਟ੍ਰਾਨਿਕ ਮੈਨੂਫੈਕਚਰਿੰਗ ਈਕੋ ਸਿਸਟਮ ਹੈ, ਜਿਸ ਵਿੱਚ ਸਾਫਟਵੇਅਰ ਡਿਵੈਲਪਮੈਂਟ, ਕਲਾਊਡ ਕੰਪਿਊਟਿੰਗ, ਵੈੱਬਸਾਈਟ ਡਿਵੈਲਪਮੈਂਟ, ਬਿਜ਼ਨਸ ਇੰਟੈਲੀਜੈਂਸ, ਫੈਬ ਮੈਨੂਫੈਕਚਰਿੰਗ, ਟੈਲੀਕਾਮ ਇਕੁਇਪਮੈਂਟ, ਇਲੈਕਟ੍ਰਾਨਿਕ ਟੈਸਟਿੰਗ ਲੇਬ ਵਰਗੇ ਵੱਖ ਵੱਖ ਖੇਤਰਾਂ ਦੀਆਂ 150 ਤੋਂ ਵੱਧ ਆਈ.ਟੀ. ਇਕਾਈਆਂ ਮੌਜੂਦ ਹਨ। ਮਰਦਾਂ ਤੇ ਔਰਤਾਂ ਦੀਆਂ 24 ਘੰਟੇ ਸ਼ਿਫ਼ਟਾਂ ਦੀ ਇਜਾਜ਼ਤ ਅਤੇ ਪਿਛਲੇ ਇਕ ਦਹਾਕੇ ਦੌਰਾਨ ਕੋਈ ਤਾਲਾਬੰਦੀ ਤੇ ਹੜਤਾਲਾਂ ਨਾ ਹੋਣ ਕਾਰਨ ਪੰਜਾਬ ਆਈ.ਟੀ. ਖੇਤਰ ਵਿੱਚ ਆਦਰਸ਼ ਥਾਂ ਵਜੋਂ ਤੇਜ਼ੀ ਨਾਲ ਉਭਰਿਆ ਹੈ।
ਡਿਪਟੀ ਕਮਿਸ਼ਨਰ ਗਿਰੀਸ਼ ਦਿਆਲਨ ਨੇ ਕਿਹਾ ਕਿ ਇਹ ਸੰਮੇਲਨ ਪੰਜਾਬ ਦੀ ਸਫ਼ਲਤਾ ਦੀ ਕਹਾਣੀ ਦੇ ਤਜਰਬੇ ਤੇ ਸਰਕਾਰ ਵੱਲੋਂ ਪੇਸ਼ ਵਿਆਪਕ ਨਿਵੇਸ਼ ਮੌਕਿਆਂ ਨੂੰ ਪੇਸ਼ ਕਰਨ ਲਈ ਆਦਰਸ਼ ਪਲੇਟਫਾਰਮ ਹੋਵੇਗਾ। ਉਨ੍ਹਾਂ ਦੱਸਿਆ ਕਿ ਸੂਬਾ ਸਰਕਾਰ ਨੇ ਪਿਛਲੇ 2.5 ਸਾਲਾਂ ਵਿੱਚ 50 ਹਜ਼ਾਰ ਕਰੋੜ ਤੋਂ ਵੱਧ ਦਾ ਨਿਵੇਸ਼ ਕਰਵਾ ਕੇ ਮੀਲ ਦਾ ਪੱਥਰ ਗੱਡਿਆ ਹੈ। ਇਸ ਮਾਅਰਕੇ ਵਾਲੀ ਪ੍ਰਾਪਤੀ ਲਈ ਰਾਜ ਸਰਕਾਰ ਦੀ ਸਨਅਤੀਕਰਨ ਅਤੇ ਵਪਾਰਕ ਵਿਕਾਸ ਨੀਤੀ ਦਾ ਵੱਡਾ ਯੋਗਦਾਨ ਹੈ, ਜਿਸ ਨੇ ਵਪਾਰਕ ਕਰਨ ਨੂੰ ਸੁਖਾਲਾ ਬਣਾਇਆ ਹੈ। ਉਨ੍ਹਾਂ ਹੋਰ ਦੱਸਿਆ ਕਿ ਸੂਬਾ ਸਰਕਾਰ ਮੁਹਾਲੀ ਤੇ ਲੁਧਿਆਣਾ ਵਿੱਚ ਮੋਬੀਲਿਟੀ ਸੈਕਟਰ, ਇਲੈਕਟ੍ਰਿਕ ਵਾਹਨ ਅਤੇ ਇੰਜਨੀਅਰਿੰਗ ਵਸਤਾਂ ਦੇ ਉਤਪਾਦਨ ਉਤੇ ਵਿਸ਼ੇਸ਼ ਤਵੱਜੋ ਦੇ ਕੇ ਹਾਈਟੈੱਕ ਇੰਡਸਟਰੀ ਲਈ ਵਿਸ਼ੇਸ਼ ਪਾਰਕ ਵਿਕਸਤ ਕਰ ਰਹੀ ਹੈ। ‘ਇਨਵੈਸਟ ਪੰਜਾਬ’ ਨਾਂ ਦੀ ਇਕ ਛੱਤ ਥੱਲੇ ਸਾਰੀਆਂ ਪ੍ਰਵਾਨਗੀਆਂ ਦੇਣ ਦੀ ਸਹੂਲਤ ਦੇ ਕੇ ਸੂਬਾ ਸਰਕਾਰ ਨਿਵੇਸ਼ ਦੇ ਪ੍ਰਵਾਹ ਨੂੰ ਸੁਚਾਰੂ ਰੱਖਣਾ ਯਕੀਨੀ ਬਣਾ ਰਹੀ ਹੈ। ‘ਇਨਵੈਸਟ ਪੰਜਾਬ’ ਬਿਉਰੋ ਨੇ ਹੁਣ 12 ਵਿਭਾਗਾਂ ਦੀਆਂ 66 ਪ੍ਰਵਾਨਗੀਆਂ ਵਾਲਾ ‘ਇਨਵੈਸਟ ਪੰਜਾਬ ਬਿਜ਼ਨਸ ਫਸਟ ਪੋਰਟਲ’ ਵੀ ਪੇਸ਼ ਕੀਤਾ ਹੈ।